2014 jylǵy «Bolashaq» baǵdarlamasynyń stıpendıattar tizimi taıaý kúnderi jarııalanady

ASTANA. 25 jeltoqsan. QazAqparat - 2014 jyly «Bolashaq» baǵdarlamasy aıasynda 1100 stıpendııa bólinedi. Bul týraly búgin «Halyqaralyq baǵdarlamalar ortalyǵy» AQ-nyń prezıdenti Ǵanı Nyǵymetov málim etti.

Onyń atap ótýinshe, búgin QR Memlekettik hatshysy Marat Tájınniń tóraǵalyǵymen Shetelde kadrlardy taǵaıyndaý jónindegi respýblıkalyq komıssııanyń otyrysy ótip, atalǵan alqaly jıynda 2014 jylǵa arnalǵan basymdyqty mamandyqtardyń tizbesi bekitilgen.

«Basymdyqty mamandyqtar tizbesine akademııalyq bilim alý 99 mamandyq engizilgen. Onyń ishinde 35-i medıtsına, 35-i tehnıka, al 29-y gýmanıtarlyq salaǵa tıesili. Sonymen qatar tizimge ǵylymı-pedagog, ınjenerlik-tehnıkalyq jáne medıtsına mamandarynyń taǵylymdamadan ótýi úshin 178 mamandyq endi. Atalǵan tizim memlekettik organdardyń ótinimderi negizinde qalyptastyryldy», - dedi Ǵ.Nyǵymetov.

Ortalyq prezıdentiniń atap ótýinshe, respýblıkalyq komıssııa túzgen bul tizim taıaý kúnderi bolashak.gov.kz saıtynda jarııa etiletin bolady.