2014 jylǵa qaraı qurylys materıaldar naryǵynyń 80 paıyzyn otandyq óndiris ıelenedi
Mysaly, 2012 jyldyń tórt aıynda ótken jyldyń sáıkes kezeńimen salystyrsa, qurylys materıaldary óndirisiniń jeke ındeks kólemi 111,9 paıyzdy quraǵan. Salanyń aldyndaǵy basty mindet - ishki óndiristi 80 paıyzǵa jetkize otyryp, qurylys materıaldaryna degen suranysty qanaǵattandyrý, dep habarlaıdy pm.kz saıty.
Elbasynyń tapsyrmasy boıynsha el Úkimeti júzege asyryp otyrǵan Indýstrııalandyrý baǵdarlamasy Qazaqstannyń qurylys ónerkásibin jańa satyǵa kóterýge múmkindik berdi. Indýstrııa jáne jańa tehnologııalar mınıstrliginiń málimetinshe, respýblıkamyz boıynsha qurylys materıaldaryn óndiretin 1254 kásiporyn bar. 2010-2011 jyldary Indýstrııalandyrý kartasy aıasynda jalpy quny 117 mlrd. teńge bolatyn 85 ınvestıtsııalyq joba paıdalanýǵa berilgen. Endi eki jylda jalpy quny 211 mlrd. teńge bolatyn 35 jobany júzege asyrý kózdelip otyr.
Qurylys ındýstrııasyn damytýda «Qoljetimdi baspana-2020» baǵdarlamasyn júzege asyrý negizgi aspektige aınalady. Bul baǵdarlama aıasynda 2020 jylǵa qaraı 63 mln. sharshy metr turǵyn úı aýmaǵy paıdalanýǵa berilmek. Osyǵan baılanysty, 2014 jylǵa qaraı otandyq qurylys materıaldarynyń óndirisin 80 paıyzǵa deıin jetkizý josparlanyp otyr.
Osy maqsattarǵa qol jetkizý úshin Úkimet is-sharalar keshenin ázirledi. Atap aıtsaq, Indýstrııa jáne jańa tehnologııalar mınıstrligi Qurylys jáne turǵyn-úı kommýnaldyq sharýashylyq isteri jónindegi agenttikpen birlese otyryp, «Qoljetimdi baspana-2020» baǵdarlamasynyń aıasynda paıdalanýǵa beriletin úılerdiń qurylysyna qajetti negizgi qurylys materıaldarynyń kólemi, sonymen qatar «Aq bulaq», TKSh jańǵyrtý jáne kólik ınfraqurylymyn damytý baǵdarlamalaryna qajetti kólemdi esepteı otyryp, qurylys materıaldarynyń negizgi túrleri boıynsha balanstardy eseptedi.
QR Indýstrııa jáne jańa tehnologııalar mınıstrliginiń málimetterine súıensek, qazirgi óndiris qýattylyqtary boıynsha tutynýshy suranysyn qanaǵattandyrý úshin tsement, armatýra, temir qubyrlar, kirpish pen beton ónimderin kóp mólsherde shyǵarý kerek. Jeke kólem ındeksiniń ósim kórsetkishteri Jambyl, Qostanaı jáne Aqtóbe oblystarynda tirkelgen. Mysaly, Jambyl oblysy «Myńaral Tas kompanııasy» JShS tsement óndiretin zaýyt esebinen osyndaı ósimge qol jetkizgen, zaýyt 2011 jyly 5 mlrd. teńgeniń ónimin shyǵarǵan.
Sonymen qatar, qurylysqa Belarýs, Germanııa jáne Reseı tájirıbelerin zertteı otyryp, qurastyrý-karkastyq jáne iri paneldi úı qurylysy tásilderi paıdalanylady. Úı qurylys kombınattaryn qurý esebinen qurylysqa ketetin shyǵyndy 30 paıyzǵa deıin azaıtýǵa bolady. Sondaı-aq ınnovatsııalyq tehnologııalar engizilip, ishki óndiristik qýattylyq kólemi de artatyn bolady. «Ónimdilik-2020» baǵdarlamasynda da úı qurylys kombınattary jobalaryn paıdalaný kózdelgen.