2014 jylǵa qaraı Qazaqstannyń farmatsevtıka salasy eksporttyq standarttarǵa kóshetin bolady - Á. Isekeshov

ASTANA. Aqpannyń 5-i. QazAqparat /Qanat Mámetqazyuly/ ‑ 2014 jylǵa qaraı Qazaqstandaǵy farmatsevtıka salasy eksporttyq standarttarǵa kóshetin bolady. Búgin QR Údemeli ındýstrııalyq-ınnovatsııalyq damý jónindegi Úılestirý keńesiniń keńeıtilgen otyrysy barysynda Indýstrııa jáne saýda mınıstri Áset Isekeshov osylaı málim etti,

dep habarlaıdy QazAqparat.

«Aǵymdaǵy jyldyń ekinshi jartysynda údemeli ındýstrııalyq-ınnovatsııalyq damýdyń 11 jobasy júzege asa bastaıdy. Onyń ishinde 3 joba basymdyq negizinde aıqyndalǵan bolyp tabylady. Jalpy, alǵanda aǵymdaǵy jyl barysynda elimizde ındýstrııalyq-ınnovatsııalyq damýdyń 23 jobasy júzege asady dep josparlanyp otyr», dedi Á. Isekeshov.

Mınıstrdiń aıtýynsha, ındýstrııalyq-ınnovatsııalyq baǵdarlama aıasynda Qazaqstanda alǵash ret mashına jasaý, farmatsevtıka sekildi salalar iri aýqymdaǵy joba retinde júzege asa bastaıdy. Bundaı sala elimiz úshin jańa ári ónimdiligi joǵary salalar bolyp tabylady. «Bunda negizinen memlekettik tapsyrys basym ról atqarady. Máselen, farmatsevtıka boıynsha biz qazir ishki suranysty tolyq zerdelep shyqtyq. Buǵan deıin Qazaqstan jyl saıyn dári-dármekti shetten satyp alyp kelse, sol dári-dármekter esepke alyna otyryp, ishki suranys bazasynda júzege asatyn negizgi jobalar aıqyndaldy. Bundaı jobalarǵa sheteldik ınvestorlar da atsalysady dep kútilýde. Jalpy, 2014 jyly elimizdegi farmatsevtıka salasy tolyǵymen ónimdi eksporttaýǵa arnalǵan standarttarǵa kóshedi. Sonymen birge, Elbasynyń tapsyrmasyna sáıkes, osy jyldary elimizdegi árbir ekinshi dári-dármek Qazaqstanda shyǵarylady», dedi Á. Isekeshov. Onyń aıtýyna qaraǵanda, bundaı tásilder medıtsınalyq qondyrǵylar, mashına jasaý sekildi salalarǵa da qoldanylady.