2014 jylǵa deıin elimizdiń 80 kóliktik baqylaý beketi avtomatty júıege aýysady - A. Jumaǵalıev

ASTANA. 16 mamyr. QazAqparat - 2014 jylǵa deıin elimizdiń 80 kóliktik baqylaý beketteri avtomatty júıege aýysady. Búgin QR Parlamenti Májilisiniń jalpy otyrysynda «Keden odaǵynyń syrtqy shekarasynda kóliktik (avtomobıldik) baqylaýdy júzege asyrý týraly kelisimdi ratıfıkatsııalaý týraly» zań jobasyn talqylaý barysynda Kólik jáne kommýnıkatsııa mınıstri Asqar Jumaǵalıev osylaı málim etti.

Toqtala ketetin jaıt, jobany talqylaý barysynda depýtat Rozaqul Halmuradov Keden odaǵy aýmaǵyna kiretin, shyǵatyn kólikterge qatysty másele kóterip, kóliktik baqylaý beketterinde sybaılas jemqorlyqtyń oryn alý mysaldaryn alǵa tartqan edi.

Óz kezeginde Kólik jáne kommýnıkatsııa mınıstri Asqar Jumaǵalıev, búgingi tańda elimizdiń kóliktik baqylaý beketterinde sybaılas jemqorlyqqa jol bermeý úshin beıne-qondyrǵylar, dıktafondar ornatylyp jatqanyn atap ótti. Mınıstrdiń aıtýynsha, álgindeı sharalar arqasynda bıýdjetke túsetin salyq pen jıyndardyń mólsheri aıtarlyqtaı artqan. «Budan bólek, biz «sıtýatsııalyq ortalyq» qalyptastyrdyq. Onda júk tasymaly, tranzıt pen avtokólik joldaryndaǵy zańsyzdyqqa jol bermeý sharalary qaralady. Árıne, bundaı jan-jaqty jaraqtanǵan beketterdiń sany az, olar  12-i ǵana. Degenmen, halyqaralyq tájirıbeni saralaı kele biz aldaǵy ýaqytta kóliktik baqylaý beketterin avtomattandyrýdy josparlap otyrmyz. Atap aıtqanda, elimizdiń shekarasyndaǵy 80 beket 2014 jylǵa deıin avtomattandyrylady. Onyń ishinde bıyl 12 beket, 2013 jyly 30 beket avtomattandyrylady. Bul shekaradaǵy kólik tranzıti men júk tasymalyndaǵy adamı faktorlardyń jolyn kesetin bolady», - deıdi mınıstr A. Jumaǵalıev.