2013 jyly jalǵa beriletin turǵyn úı qurylysyna bólingen qarjy 99,4 paıyzǵa ıgerildi

ASTANA . 14 qańtar. QazAqparat - Jalǵa beriletin baspananyń qurylysy boıynsha jyldyq jospardy barlyq ákimdikter oryndady. Bul týraly búgin «Qoljetimdi baspana-2020» baǵdarlamasyn júzege asyrý máselesine arnalǵan Úkimet otyrysynda Óńirlik damý mınıstri Bolat Jámishev málim etti.

Respýblıkalyq bıýdjet esebinen salynyp jatqan turǵyn úı máselesine toqtalǵan mınıstr, «2013 jyly jalǵa beriletin turǵyn úı qurylysyna oblystar men Astana jáne Almaty ákimdikterine 27,5 mlrd. teńge maqsatty transfertter bólinip, aldyn ala málimetter boıynsha 27,3 mlrd. teńgesi nemese 99,4 paıyzy ıgerildi»,- dedi mınıstr. Onyń sózine qaraǵanda, jalǵa beriletin baspananyń qurylysy boıynsha jyldyq jospardy barlyq ákimdikter oryndady. Atap aıtqanda, 402,6 myń sharshy metr turǵyn úı salyndy.