2013 jyly kedenshiler qysqaratyn bolady - Májıt Esenbaev
«Meniń oıymsha, 2013 jyly tıisti úderisterdi tolyǵymen júzege asyrǵannan keıin biz kedenshilerdiń sanyn qysqartý jaıynda sóz qozǵaıtyn bolamyz. Atap aıtqanda, aldaǵy jyly kedenshilerdiń qansha paıyzy qysqaratynyn sol kezde aıtatyn bolamyn»,-dedi M. Esenbaev.
Keden beketterin sanattaý jumystary atqarylyp jatqanyna toqtalǵan komıtet basshysy, eger 2011 jyly 107 keden beketi bolsa, qazir 95-i qalǵanyn, ıaǵnı kedendik baqylaýǵa nuqsan keltirmesten, sanattalǵan kedendik beketterdi ońtaılandyrý jumystary júrgizilip jatqanyn atap ótti.
Esterińizge sala keteıik, bıylǵy sáýirde M. Esenbaev keden beketterin sanattaý jumystary atqarylatynyn habarlaǵan bolatyn. Onyń sózine qaraǵanda, Keden beketterin jabdyqtaý deńgeıi men geografııalyq ornalasýy, sondaı-aq rásimdeletin taýarlardyń qurylymy boıynsha sanattaý jumystary júrgiziledi. «Búginde 107 kedendik beket bar. Onyń ishinde 25-i shekarada ornalasqan. Ár beketke pasport ázirleý qarastyrylyp otyr. Atalǵan qujatta kedendik bekettiń qyzmeti eskerilip, onda bekettiń jáne ár kedenshiniń jumysy reglamentteledi. Sondaı-aq tıimsiz kedendik beketterden bas tartylatyn bolady»,-dep aıtqan bolatyn komıtet basshysy.
Konsýltatıvtik Keńes keden organdary men bıznes-qoǵamdastyqtar arasyndaǵy áriptestik arqyly syrtqy ekonomıkalyq qyzmet salasyndaǵy kókeıkesti máselelerdi talqylaý jáne ákimshilik kedergilerdi joıý boıynsha tıimdi sheshimder shyǵarý maqsatynda quryldy. Atalǵan keńes aıasynda kedendik ákimshilendirýdi jetildirý; kedendik ákimshelendirý salasyndaǵy ІT-tehnologııalardy jetildirý; keden zańnamasyn jetildirý; keden isi salasyndaǵy memlekettik qyzmet kórsetý monıtorıngi boıynsha usynystar ázirleý úshin birlesken jumys toptary quryldy.
Búgingi otyrystyń kúntártibinde ınvestıtsııalyq ahýaldy jaqsartý, syrtqy saýda qatynastaryn, kóliktik jáne kommýnıkatsııalyq ınfraqurylymdy damytý, ákimshilik rásimdeýdi jetildirý máseleleri kóterildi.