2013 jyly bıýdjet esebinen 400-ge tarta basylym ınternetke aýystyrylady
Bul týraly búgin Astanada ótken «Qazaqstandyq BAQ jáne ınternet-resýrstardyń básekege qabilettiligin arttyrý» atty semınar-trenıngte QR Mádenıet jáne aqparat mınıstrligi Aqparat jáne muraǵat komıtetiniń tóraǵasy Bolat Kalıanbekov málim etti.
Komıtet basshysynyń atap ótkenindeı, 2013 jyldan bastap elimizde «Aqparattyq Qazaqstan-2020» memlekettik baǵdarlamasy iske asyrylýda. Onyń negizgi maqsattarynyń biri otandyq aqparattyq keńistikti damytý bolyp tabylady.
«Baǵdarlama aıasynda 2013 jyldyń birinshi jartyjyldyǵynda respýblıkalyq bıýdjet qarjysynan 205 basylym ınternetke aýystyryldy. Jyldyń sońyna deıin BAQ-qa arnalǵan ınternet-resýrstardyń jalpy sany 400-ge deıin jetkiziledi. Búginde bizdiń aımaqtardaǵy basylymdar respýblıkalyq baspasózge qaraǵanda zaman aǵymynan qalyp barady. Olar burynǵy ádispen, áli qaǵaz betinde jarııalanyp keledi», - dedi ol.
B.Kalıanbekovtyń sózine qaraǵanda qazirgi ýaqytta Qazaqstanda ınternet paıdalanýshylardyń sany artyp keledi. Sondyqtan gazet-jýrnaldardyń ınternet úlgileri bolýy shart. QR Kólik jáne kommýnıkatsııa mınıstrliginiń málimeti boıynsha, 2013 jyly naýryz aıynda Qazaqstanda ınternettiń kirigý deńgeıi 62,3 paıyzdy quraǵan. Bul shamamen 10 mln. astam adam.