2013 jyly áleýmettik mańyzy bar qyzmetterdiń paketi elektrondy formatqa kóshiriledi

ASTANA. 17 jeltoqsan. QazAqparat - Kelesi jyly Qazaqstanda «elektrondy úkimetti» iske qosý aıasynda áleýmettik mańyzy bar qyzmetterdiń barlyq peketterin elektrondy formatqa kóshirý josparlanýda, dep habarlandy QR Premer-Mınıstrdiń baspasóz qyzmetinen. 

«2012 jyly áleýmettik mańyzy bar qyzmetterdiń 60 paıyzy elektrondy nusqaǵa aýystyryldy. 2013 jyly bul kórsetkish 100 paıyzǵa jetedi dep josparlanýda», - dedi «Ulttyq aqparattyq tehnologııalar» AQ basqarma tóraǵasynyń orynbasary Alekseı Anısımov.

Jobany iske asyrýshylardyń sózine qaraǵanda, uıaly gadjetterge suranystyń artýyna baılanysty e-Gov-tyń paıdalanýshylary portaldyń qyzmetterine iOS jáne Android qosymshalary arqyly jeńil kire alady. 

Ulttyq aqparattyq tehnologııalar» AQ basqarma tóraǵasy orynbasarynyń sózine qaraǵanda, 2013 jyly elektrondy nusqada alynatyn ruqsatnama qujattardyń tizimin 353-ke deıin keńeıtý josparlanýda. Aıta keteıik, 2012 jyly bul kórsetkish 87-ni quraǵan bolatyn. 2014 jyly ruqsatnama qujattardyń barlyq túrlerin portal arqyly elektrondy nusqada alýǵa bolady, dedi A.Anısımov.

Aǵymdaǵy jyldyń birinshi toqsanynda jasalǵan qorytyndyǵa sáıkes, «elektrondy úkimettiń» portalynda elektrondy nusqada 67 qyzmet, 16 servıs, memlekettik alymdardyń 21 túrine tóleýdi júrgizý, memlekettik baj salyǵyn tóleýdiń 16 túri, salyq tóleýdiń 4 túri, sondaı-aq jol erejesiniń qozǵalysyn buzǵany úshin aıyppuldardy jáne kommýnaldyq qyzmetterdi tóleýdiń 3 túri kórsetiledi. Portal arqyly osy kezeń aralyǵynda 3 489 364 elektrondy anyqtama berildi, al portaldy qoldanýshylardyń sany 4 410 558 adamdy qurady. Jyl saıyn e-Gov portalynyń qyzmetine 20 myńnan astam adam júginedi.

Búgingi kúni «E-lıtsenzııalaý» memlekettik málimetter bazasy barlyq ortalyq memlekettik jáne jergilikti atqarýshy organdarda engizilgen, bul óz aldyna kez kelgen lıtsenzııany elektrondy nusqada alýǵa múmkindik beredi.

Qazaqstanda 2012 jylǵy «elektrondy úkimettiń» damý deńgeıin álemdik qoǵamdastyq joǵary baǵalady.