2013 jyldyń on aıynda Keden odaǵy elderiniń ózara taýar aınalymy 52,9 mlrd. dollardy qurady

ASTANA. 10 qańtar. QazAqparat - 2013 jyldyń qańtar-qazan aılary aralyǵynda Keden odaǵy elderiniń ózara taýar aınalymy 52,9 mlrd. dollardy qurady. Bul 2012 jyldyń osy kezeńdegi kórsetkishine qaraǵanda shamamen 6 paıyzǵa tómen. Búgin Astanada Eýrazııalyq ekonomıkalyq odaq týraly kelisim jobasyn talqylaýǵa arnalǵan beıne-konferentsııa barysynda QR Ekonomıka jáne bıýdjettik josparlaý vıtse-mınıstri Tımýr Jaqsylyqov málim etti.

«Ókinishke qaraı, Keden odaǵy aıasyndaǵy qazaqstandyq eksport, ımport dınamıkasyna qaraǵanda qalys taýyp kele jatyr», - deıdi T. Jaqsylyqov. Budan bólek, vıtse-mınıstr ekonomıkalyq ıntegratsııa máselelerindegi jańalyqtarǵa toqtala kele, 2014 jyldyń 1 qańtarynan bastap Qazaqstan, Reseı men Belarýs arasyndaǵy Biryńǵaı ekonomıkalyq keńistiginiń quqyqtyq bazasyn qalyptastyrý sheńberinde jasalǵan Memlekettik (mýnıtsıpaldyq) satyp alý týraly kelisimge oraı, memlekettik satyp alýdy júzege asyrý kezinde ulttyq rejım engiziledi. Jalpy ulttyq rejım 2014 jyldyń 1 qańtarynan engiziledi. Onyń aıtýynsha, ulttyq rejımde memlekettik satyp alýlarǵa otandyq óndirýshilermen qatar sheteldik óndirýshilerdiń qatysýy qarastyrylady. «Reseı men Belarýs mundaı rejımdi bir-birine 2012 jyly usynǵan bolatyn. Biz eki jyl ótpeli kezeńdi aldyq. Jalpy, bizdiń jetkizýshilerimiz endigide Reseı men Belarýs elderiniń memlekettik jáne mýnıtsıpaldyq satyp alýlaryna qatysa alatyn bolady», - deıdi vıtse-mınıstr.