2013 jyldyń 1 jartyjyldyǵynda Zań shyǵarý ınstıtýty 70-ten astam zań jobasy boıynsha konsýltatsııalyq qyzmetter kórsetti - B.Imashev
Bul týraly búgin QR Zań shyǵarý ınstıtýtynyń 20 jyldyǵyna arnalǵan «Jańa saıası baǵyt aıasynda Qazaqstan Respýblıkasy zańnamasyn jetildirýdiń ózekti máseleleri» taqyrybyndaǵy halyqaralyq ǵylymı-praktıkalyq konferentsııanyń ashylý rásiminde sóz sóılegen elimizdiń Ádilet mınıstri Berik Imashev osylaı dedi.
Mınıstrdiń atap ótýinshe, ınstıtýt «Qazaqstan Respýblıkasyndaǵy quqyqtyq reformanyń tıimdiligin arttyrý jónindegi sharalar týraly» 1993 jylǵy 16 maýsymdaǵy QR Prezıdentiniń Jarlyǵymen qurylǵan. Onyń negizgi maqsaty memlekettiń quqyq shyǵarmashylyq fýnktsııasyn iske asyrýǵa járdemdesý boldy. 1998 jyldyń sáýirinde zań shyǵarý ǵylymı-zertteý ınstıtýty Qazaqstan Respýblıkasy Ádilet mınıstrligi janyndaǵy Zań shyǵarý ınstıtýty bolyp qaıta quryldy. Úkimettiń 2010 jylǵy 22 qańtardaǵy № 22 qaýlysymen ınstıtýtqa memlekettik mekeme mártebesi berilgen. «Osylaısha, Zań shyǵarý ınstıtýty óziniń jıyrma jyldyq qyzmetinde zańnamalyq aktiler jobasynyń 350-den astamyn ázirleýge tikeleı qatysty, ınstıtýt qyzmetkerleri zań jobalarynyń 400-den asa ǵylymı quqyqtyq saraptamasyn, qabyldanatyn zańdardyń tıimdiligin boljaýdy, sondaı-aq halyqaralyq sharttar men zańdar jobalarynyń lıngvıstıkalyq saraptamalaryn júrgizdi. Instıtýt qyzmetkerleri memlekettik organdar zań jobalarynyń tujyrymdamalary men zań jobalaryn ázirlegen kezde jumys toptarynyń otyrystaryna qatysyp otyrady.
«2012 jyly ınstıtýt 84 zań jobasy, 102 zań jobasynyń tujyrymdamasy, 8 zańnamany jetildirý tujyrymdamasy boıynsha konsýltatsııalyq qyzmetter kórsetti. Tek 2013 jyldyń birinshi jartyjyldyǵynyń ózinde 70-ten astam zań jobasy boıynsha, 30 zań jobasynyń tujyrymdamasy boıynsha konsýltatsııalyq qyzmetter kórsetti, halyqaralyq sharttar men zańdardyń 70 jobasyna lıngvıstıkalyq saraptama júrgizdi», - dedi B.Imashev.
Onyń aıtýynsha, ınstıtýttyń ǵylymı qyzmeti júıeli, keshendi negizde júzege asyrylyp keledi. Jyl saıyn el Prezıdentiniń Joldaýynan, memlekettiń strategııalyq jáne baǵdarlamalyq qujattarynan týyndaıtyn taqyryptar boıynsha irgeli ǵylymı qoldanbaly zertteýler júrgiziledi.