2013 jyldan bastap jyljymaıtyn múlikke quqyqty elektrondyq tirkeý engiziledi
Búgin Májiliste ótken Úkimet saǵatynda baıandama jasaǵan Ádilet mınıstri Berik Imashev osylaı málim etti.
Mınıstrdiń aıtýynsha, elektrondyq format quqyqty tirkeýdi bir kúnniń ishinde júzege asyrýǵa múmkindik týǵyzady. «Sonymen qatar, aldaǵy ýaqytta zańdy tulǵalardy tirkeýmen qosa, olardy joıý nemese taratý úderisteri de ońaılatylady. Bul rette biz jańa zań jobasyn ázirlep jatyrmyz. Ondaǵy basty jańalyq - shaǵyn bıznesti tirkeý týraly eskertpeni Internet arqyly berý normasy engiziledi. Osylaısha, bıznes ókilderi úshin bir kúnniń ishinde derlik óz isin ashýǵa múmkindikter týady», - deıdi B. Imashev.
Sonymen qatar, mınıstr azamattyq hal aktilerin tirkeý úderisteri de ońtaılanatynyn atap ótti. Máselen, aǵymdaǵy jyly qujattardy rastaý týraly ótinish elektrondyq nusqada da qabyldana bastaǵan. «Memlekettik qyzmetter kórsetý barysynda jurtshylyqtan talap etiletin qujattar sanyn odan ári qysqartý da jalǵasýda. Eger buǵan deıin jurtshylyq ádilet organdaryna 4-5 qujatqa deıin kórsetýleri tıis bolatyn bolsa, qazir olardyń tizbegi 2-1 qujatqa deıin qysqardy. Aǵymdaǵy jyl basynan beri «AHAJ «E-Muraǵat» qurý boıynsha jumystar bastaldy. Soǵan sáıkes, 2007 jylǵa deıin AHAJ muraǵatynda saqtalǵan barlyq qujat elektrondyq formatqa aýystyrylady», - dedi vedomstvo basshysy.