2013 jyldan bastap lıtsentsııalardyń barlyq túrleri elektrondyq úlgide bolady - salyq ınspektory Oksana Janseıitova

ALMATY. 22 qazan. QazAqparat - Memlekettik organdardyń qyzmetine júginý kezinde quqyqtyq maǵlumatynyń azdyǵynan qarjysyn ǵana emes qundy ýaqytyn da zaıa ketirip júrgender áli azaımaı tur.

Almaty qalalyq salyq departamentiniń alkogoldik jáne aktsızdik ónimderdi ákimshilendirý bóliminiń jetekshi salyq ınspektory Oksana Janseıitovanyń aıtýynsha, óz quqyǵyn jetik bilmeýdiń saldarynan senim hat arqyly deldaldardyń kómegine júginýshiler kóp. Olardyń arasynda ózderine senim bildirgen azamattardyń ǵana emes memlekettik qyzmet mekemeleriniń qyzmetkerleriniń jáne onda kezekte turǵan ózge azamattardyń da ýaqytyn alatyndar bar.

Elbasynyń halyqqa arnaǵan bıylǵy Joldaýynda: «2012 jyldyń aıaǵyna deıin áleý­mettik mańyzy bar memlekettik qyzmet­terdiń 60 paıyzy, sonyń ishinde lıtsenzııalardyń barlyq túrleri, tek qana elek­trondy túrde bolýǵa tıis. 2013 jyldan bastap memleketten barlyq ruqsat etýshilik qujattardy da qazaqstandyqtar elektrondy túrde nemese Halyqqa qyzmet kórsetý orta­lyq­tary arqyly alýǵa tıis», - degen bolatyn.

Oksana Olegqyzynyń sózine qaraǵanda, lıtsenzııa alýda kásipkerlerge deldaldardyń esh qajeti joq. Bıyl alkogoldi ónimderge lıtsenzııa berý kezinde talap etiletin qujattar sany azaıtylyp, bul rásim aıtarlyqtaı jeńildetildi. Jeke jáne zańdy tulǵalarǵa qoıylatyn talap birdeı. Máselen  jeke kásipkerge onyń esepte turǵany týraly kýáligi, salyq tóleý nómiri, jeke kýáligi, kassalyq apparatynyń tirkeý kartochkasy men eger nysandy jalǵa alatyn bolsa bul kelisimniń kóshirmesi qajet.