2012 jyly ÚEU-dyń áleýmettik mańyzdy jobalaryn qarjylandyrýǵa elordalyq bıýdjetten 38 mln. 100 myń teńge bólindi - B. Tilepov
Bul týraly búgin Astanadaǵy «Qazaqstan» ortalyq kontserttik zalynda ótken Úkimettik emes uıymdardyń qalalyq forýmynda Astana qalasy ishki saıasat basqarmasynyń bastyǵy Bolat Tilepov aıtty.
Onyń aıtýynsha, úkimettik emes uıymdar azamattyq bastama tanyta otyryp, túrli saladaǵy áleýmettik mańyzdy máselelerdi sheshýge erikti túrde belsendi aralasady. «Eger ÚEU tym bolmaǵanda bir azamatqa nemese bir otbasyǵa kómektese alǵan bolsa, onda bizdiń eńbegimizdiń jemisti bolǵany degen sóz», - deıdi ol.
«Jalpy aıtqanda, osynyń aldynda ótken forým qala basshylyǵy men ÚEU arasynda áriptestik qarym-qatynastyń ornaýyna úlken septigin tıgizdi. Áleýmettik mańyzy bar máselelerdi birigip sheshý jumystary áriptestiktiń eń negizgi tiregi retinde qala bermek», - deı kele, B. Tilepov búgingi forýmnyń kún tártibinde turǵan máselelerdiń kóp ekenin, solardyń biri ÚEU qatysatyn konkýrstyq protsedýralardyń kúnnen kúnge úkimettik emes uıymdardyń damýyna keri eser etip kele jatqandyǵyn aıtty.
«Konkýrstarda jeńimpaz bolyp tanylǵan qoǵamdyq birlestikterdiń barlyǵy derlik alǵashqy tólemderin almaǵan. Kóptegen ÚEU-dyń qyzmeti memlekettik tapsyrystardy oryndaýǵa arnalǵan, alaıda olardyń kóbinde aktıvteri joq. Basy artyq qarajattary týraly aıtýdyń ózi artyq. Sondyqtan memlekettiń áleýmettik tapsyrystaryn oryndaýshylarǵa arnalǵan qarjylyq talaptardy qaıta qaraý kezek kúttirmeıtin másele. Bul olqylyqtar áleýmettik mańyzy bar jobalardy oıdaǵydaı oryndaýǵa edáýir kesirin tıgizip keledi», - dedi B. Tilepov.
Atalǵan forým Astana qalasynyń ishki saıasat basqarmasy men «ÚEU qoldaý Ortalyǵy - Astana» jeke qorynyń uıymdastyrýymen ótkizildi.
Sharaǵa QR Parlamenti Májilisiniń, Astana qalalyq máslıhatynyń depýtattary men ÚEU ókilderi qatysty.