2012 jyly iri ındýstrııalyq 11 joba iske asyryla bastaıdy
«Bul jobalardyń bári bizdiń ekonomıkamyzdyń, bizdiń elimizdiń beınesin bútindeı ózgertetin bolady... Biz búkil Qazaqstandy alyp qurylys alańyna aınaldyryp, myńdaǵan jumys ornyn quramyz»,- dep atap kórsetti Elbasy Qazaqstan halqyna Joldaýynda.
Indýstrııalandyrý memlekettik baǵdardamasy iske asyryla bastaǵan eki jyldyń ishinde jalpy somasy 1,8 trln. teńgeniń 389 jobasy iske qosyldy, 90 myń jańa jumys orny quryldy.
2012 jyly salynyp jatqan 220 joba boıynsha da jumystar kúsheıtilmek. Aǵymdaǵy jyldyń sońyna deıin 130 ındýstrııalyq joba iske qosylady dep josparlanýda. Indýstrııalandyrý kartasynyń ózektiligin arttyrýda ınnovatsııalarǵa, qazaqstandyq qamtýdyń úlesin arttyrýǵa, energııa tıimdiligin arttyrýǵa jáne aqtyq ónimder shyǵarýǵa basymdyq berilip otyr.
Elbasynyń Joldaýynda aıtylǵan iri ındýstrııalyq jobalardyń qurylysy aǵymdaǵy jyly bastalady. Olar: «Batys Eýropa - Batys Qytaı» halyqaralyq tranzıttik dálizin qaıta jańartý jobasy, Balqash JES-nyń qurylysy, Atyraý oblysyndaǵy «KPI» JShS-niń yqpaldasqan gaz-hımııalyq kesheniniń qurylysy, Atyraý munaı óńdeý zaýytyndaǵy munaıdy tereń óńdeý kesheniniń qurylysy, «Býrabaı» týrıstik ortalyǵyn qurý jobalary.
«Batys Eýropa-Batys Qytaı» jobasy boıynsha 2012 jyly jumysqa 35 myńnan astam adam tartyla otyryp, 700 shaqyrym jańa jol paıdalanýǵa berilmek.
Qýaty 1320 megavatty quraıtyn Balqash JES-nyń qurylysy energııa jetispeýshiligi problemasyn sheshýge jáne elimizdiń ońtústik óńirleriniń energııa táýeldiliginen bosatýǵa múmkindik beredi.
Atyraý oblysyndaǵy yqpaldasqan gaz-hımııalyq keshenniń qurylysynyń arqasynda Qazaqstan jyl saıyn 500 myń tonna propılen jáne 800 myń tonna polıetılen shyǵaratyn bolady. 2012 jyldyń tórtinshi toqsanynda tehnologııalyq jabdyqtar ornatylatyn qurylǵylardy montajdaý bastalady.
Aǵymdaǵy jyldyń ekinshi toqsanynda Atyraý munaı óńdeý zaýytyndaǵy munaıdy tereń óńdeý kesheniniń qurylysy bastalady. Quny 1,7 mlrd. dollardy quraıtyn bul joba benzın óndirisin 3 esege - 1,7 mln. tonnaǵa deıin, dızeldik otyn óndirisin -1,4 mln. tonnaǵa deıin arttyrýǵa múmkindik berip, Qazaqstandy otynnyń atalmysh túrlerimen qamtamasyz etedi.
Oǵan qosa, «Býrabaı» týrıstik ortalyǵyn qurý, Jambyl oblysynda mıneraldyq tyńaıtqyshtar zaýytynyń qurylysy, Almaty tań shańǵysy kýrorty, Batys Qazaqstan oblysyndaǵy Qarashyǵanaq gaz óńdeý zaýytynyń qurylysy, Qazaqstannyń ortalyǵyna gaz tartýǵa negizdelgen «Qartaly-Tobyl-Kókshetaý-Astana» gaz qubyry jelisiniń qurylysy, «Arqalyq-Shubarkól» jáne «Jezqazǵan-Beıneý» temirjoldarynyń qurylysy sııaqty iri jobalar iske asyrylady.
Údemeli ındýstrııalyq-ınnovatsııalyq damytý boıynsha memlekettik baǵdarlama Qazaqstan ekonomıkasyn jańǵyrtýdyń basty baǵdary bolyp qalýda. Indýstrııalandyrý kartasyn oryndaý, jańa ındýstrııalyq jobalardy iske qosý jáne olardy óndiristik qýatqa shyǵarý -Úkimettiń baqylaýyndaǵy ózekti máseleler.