2012 jyly Densaýlyq saqtaý mınıstrliginiń 141 mln. teńgesi memlekettik áleýmettik tapsyrys aıasynda ÚEU-larǵa beriledi
Bul týraly búgin ótken baspasóz máslıhatynda QR DSM Strategııalyq damý departamentiniń dırektory Bolat Tókejanov málim etti.
B.Tókejanov atap kórsetkendeı, Qazaqstan Respýblıkasynyń densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasynda sektoraralyq ózara is-árekettestikke basa nazar aýdarylǵan. Osyǵan baılanysty
mınıstrlik, aýrýlardyń aldyn alý jáne aqparattyq-nasıhattaý jumystarynyń tıimdiligin odan ári jaqsartý maqsatynda memlekettik áleýmettik tapsyrystarǵa ÚEU-lardy tartýdy sheshti. Bul maqsatqa vedomstvo qazynasynan barlyǵy 141 mln. teńge bólinip otyr. Jobalar túrli 17 baǵyt boıynsha júzege asyrylatyn bolady.
B.Tókejanovtyń aıtýynsha, Qazaqstanda jumys isteıtin 100-den astam ÚEU-nyń arasynan «Memlekettik áleýmettik tapsyrys týraly» QR Zańyna súıene otyryp, olardyń 16-sy iriktep alyndy. Jobalar 2012 jyldyń qańtarynan bastap júzege asyryla bastaıdy.
Al memleketten bólinip otyrǵan qarajattyń tıimdi ári maqsatty ıgerilýin qadaǵalaý úshin jáne ÚEU-larmen únemi tyǵyz baılanysta bolý maqsatynda QR Densaýlyq saqtaý mınıstrliginiń janynan Úkimettik emes uıymdarmen yntymaqtastyq jáne ózara árekettestik jónindegi keńes quryldy.
Keńestiń maqsaty - mınıstrlik qyzmetiniń azamattyq qoǵammen úılestirilýin qamtamasyz etý, salany damytý baǵdarlamasyn jarııa etý jáne oryndaý, azamattyq qoǵamdy strategııalyq, saıası jáne aǵymdaǵy sheshimderdi qabyldaý úrdisine tartý, azamattyq bastamashylyqtyń damýyna jaǵdaı jasaý, densaýlyq saqtaý salasyndaǵy memlekettik saıasatty jetildirý boıynsha usynystarǵa bastamashylyq etý, ÚEU bastamalaryn qaraý jáne qoldaý, mınıstrlik pen oǵan qarasty vedomstvolyq uıymdardyń ÚEU-larmen ózara árekettestigin damytý.
ÚEU-lar júzege asyratyn áleýmettik jobalar ómir súrý uzaqtyǵyna, salaýatty ómir saltyn nasıhattaý men reprodýktıvti densaýlyqty nyǵaıtýǵa, qant dıabetimen aýyratyn naýqastardyń ómir súrý sapasyn jaqsartýǵa, profılaktıkalyq medıtsınany ary qaraı nyǵaıtýǵa baǵyttalǵan. Sondaı-aq, birqatar jobalar medıtsınalyq qyzmetter men dári-dármek sapasy máselelerine, áleýmettik qyzmetkerlerdi daıyndaýǵa, medıtsınalyq qyzmetkerlerdiń mártebesin kóterýge, sonymen birge elimizdiń barlyq aýmaqtarynda «Salamatty Qazaqstan» memlekettik baǵdarlamasyn monıtorıngileýge arnalyp otyr.
Departament basshysynyń aıtýynsha, búgingi kúni ÚEU-lar júzege asyryp otyrǵan jobalar ózderiniń qoǵamǵa qajettilikterin dáleldedi. Máselen, ústimizdegi jyldyń 9 aıy ishinde Qazaqstanda jumys isteıtin Jastar densaýlyǵynyń 32 ortalyǵyna 107 myńnan astam jetkinshek kómek surap habarlasqan (2010 jyldyń sáıkes kezeńinde bul san 31 myńna sál kóp boldy). Olardyń 40 paıyzy - jigitter, 60 paıyzy - qyzdar. Qaıta habarlasqandardyń sany - 15 155 adam. Habarlasqandardyń ýájderiniń basym bóligi reprodýktıvti densaýlyq, zańgerlerden keńes alý máselelerine qatysty boldy.