2012 jyldan bastap Qazaqstanda tarıf qalyptastyrýdyń jańa túri engiziledi - N.Aldabergenov

ALMATY. 14 qyrkúıek. QazAqparat /Erbol Azanbek/ - 2012 jyldan bastap Qazaqstanda tarıf qalyptastyrýdyń jańa túri engiziledi. Bul týraly búgin Almatyda ótip jatqan «Energetıka tıimdiligi saıasatyn retteý saldary» atty halyqaralyq semınar barysynda QR Tabıǵı monopolııalardy retteý agenttiginiń tóraǵasy Nurlan Aldabergenov aıtty.

«Beach marking» dep atalatyn jańa tásildi engizý - kásiporyndarda energııany únemdeý boıynsha jańa tehnıka, jańa tásilderdi engizýge ıtermeleıdi»,- dedi agenttik basshysy. Onyń sózine qaraǵanda Qazaqstanda energııa tasymaldaý kezinde shyǵyn kólemi 18-20 paıyzdy quraıdy. Bul kórsetkish Eýropa elderinde 9 paıyz, AQSh-ta 10, Ońtústik Koreıada 4-5 paıyzdy quraıdy. «Aldaǵy ýaqytta jańa tarıf qalyptastyrý tásilin engizý arqyly biz energetıka tasymaly shyǵynyn kem degende Eýropa memleketteriniń deńgeıine jetkizýdi kózdeımiz»,- dedi N.Aldabergenov.

Onyń aıtýynsha, Qazaqstan sońǵy 2 jylda energııa únemdeý boıynsha belsendi saıasat júrgizip otyr. «Máselen elektr energııasyn únemdeý boıynsha saralanǵan tarıf engizildi, sondaı-aq túngi jáne kúndizgi tarıfterdi engizdik. Bunyń nátıjesinde byltyr turǵyndar 13,5 mln. AQSh dollaryn únemdedi. Tarıf saıasatyn damytý jaryqpen qatar sý, jylýǵa da engizilip otyr. Bul baǵyttaǵy saıasatymyzdy aldaǵy ýaqytta damyta beremiz»,- dedi N.Aldabergenov.

Ol óz sózinde bul turǵyda arnaıy zań aktlerine ózgerister engizilgendigine de jáne aldaǵy ýaqytta tarıf saıasatyn ózgertý boıynsha zańdarǵa taǵy ózgerister engiziletindigin eskertti. «Usynystardy bıylǵy jyldyń aıaǵyna deıin Parlamentke engizemiz», - degen Agenttik basshysy jyl sońyna deıin jaryq pen jylý baǵasy óspeıtindigin atap ótti. Tek jylý baǵasy jekelegen aımaqta azdaǵan ózgeriske ushyraýy múmkin.