2010 jylǵa qajetti dári-dármekterdiń 63 paıyz kólemi Qazaqstannyń medıtsınalyq mekemelerine jetkizildi - «SK-Farmatsııa»
Bul týraly búgin ótken baspasóz máslıhatynda «SK-Farmatsııa» JShS-nyń bas dırektory Vadım Zverkov málim etti, dep habarlaıdy QazAqparat.
V.Zverkovtyń aıtýynsha, jańadan qurylǵan kompanııaǵa ótken jyly ilki joba retinde dári-dármekterdiń 27 túri boıynsha satyp alýlar júrgizý júkteldi. Onyń oń nátıjesinen keıin, QR Densaýlyq saqtaý mınıstrligi kepildendirilgen tegin medıtsınalyq kómek aıasyndaǵy satyp alýlardyń jalpy kóleminiń 70 paıyzyn nemese dárilik preparattardyń 800-ge jýyq túrin «SK-Farmatsııaǵa» berdi.
Kompanııa 2009 jylǵy qarashanyń 19-ynan bastap tender ótkizip, jeltoqsannyń sońy men aǵymdaǵy qańtar aıynyń basynda 700 preparat boıynsha jeńimpaz atanǵan 39 jetkizýshi kompanııamen kelisimsharttarǵa otyrýdy bastady.
«Kelisimshartqa sáıkes kompanııalar dári-dármekterdi Qazaqstanǵa 60 jumys kúni ishinde jetkizýi tıis. Biraq keıbir sheteldik zaýyttar preparatqa tapsyrysty alǵan kúnnen bastap, ony 90 kúnniń ishinde daıyndaıdy. Al otandyq zaýyttar tapsyrysty oryndaýdy ótken aqpan aıynan bastady. Búgingi kúni kepildendirilgen tegin medıtsınalyq kómektiń tizimine engen 685 preparattyń 388-in nemese 63 paıyzyn (jalpy somasy 27 mıllıard teńge) meduıymdarǵa jetkizdik. Aldaǵy sáýir aıynyń ortasyna deıin qajetti kólemdi 100 paıyzǵa jabatyn bolamyz», - dedi ol.
Bas dırektordyń aıtýynsha, kepildendirilgen tegin medıtsınalyq kómek sheńberinde dári-dármekter medıtsınalyq mekemelerge qańtardyń 1-inen keshikpeı túsý úshin, medıtsınalyq uıymdardyń bas dárigerleri olar boıynsha tizimdi aldyn ala jasaqtap, qyrkúıek aıynyń 1-inen keshiktirmeı usynýy tıis.
Sondaı-aq V.Zverkov atap kórsetkendeı, «SK-Farmatsııa» JShS memlekettik satyp alýlarda otandyq óndirýshilerdiń úlesin 10-nan 23 paıyzǵa deıin ulǵaıtqan. «Eger buǵan deıin dári-dármekterdiń 87 paıyzy shet elderden satyp alynyp, qalǵan 10 paıyzǵa jýyǵy ǵana Qazaqstanda óndirilip kelse, búgin satyp alýlar qurylymynda otandyq úlestiń kólemi 23 paıyzǵa jetkizildi», - deıdi.
Sonymen birge, «SK-Farmatsııa» arqyly satyp alynǵan dári-dármekterdiń baǵasy burynǵydan birneshe ese arzanǵa túsken.
V.Zverkovtyń sózine qaraǵanda, qazirgi kúngi kompanııa aldynda týyndap otyrǵan túıtkildi másele - dári-dármekterdi aımaqtarǵa, olardyń sapasyn buzbaı jetkizý úshin arnaıy tehnıka qajet.