2009 jylǵy halyq sanaǵynda bolǵan kemshilikter qaıtalanbaıdy - komıtet tóraǵasy

NUR-SULTAN. QazAqparat - 2009 jyly halyq sanaǵynda bolǵan kemshilikter bıylǵy halyq sanaǵynda qaıtalanbaıdy. Bul týraly Ulttyq ekonomıka mınıstrligi Statıstıka komıtetiniń tóraǵasy Nurbolat Aıdapkelov aıtty, dep habarlaıdy QazAqparat tilshisi.

«2009 jyly Ulttyq halyq sanaǵy kezinde bolǵan qatelikterdi eskerdik. Bıylǵy sanaq barlyq talaptarǵa saı bolady. Biz ıntervıýerlerdiń qaýipsizdigi týraly da oılap, oblystyq ákimshiliktermen jumys istep jatyrmyz. Keıbir «qıyn» aýdandardy ıntervıýerler ýchaskelik polıtsııalarmen birge aralaıdy», - dedi Nurbolat Aıdapkelov Ortalyq kommýnıkatsııalar qyzmetinde ótken jıynda.

Ol bıyl halyq sanaǵy qalaı júretinin aıtty.

«Statıstıka komıtetiniń azamattary eshqandaı memlekettik satyp alý protsesine qatyspaıdy. Ózderińiz biletindeı, QR Qarjy mınısrliginiń ishinde memlekettik satyp alýlarǵa arnalǵan arnaıy saıt bar. Sol jerde búkil satyp alýlar elektrondy túrde júrgiziledi. Kim utyp alady, sonymen kelisimshartqa otyramyz. Sodan keıin ár oblysta ákim basqaratyn komıssııa bolady. Onyń janynan Statıstıka organy taǵy komıssııa quryp, adamdardy jumysqa alý máselesin sheshedi», - deıdi ol.

Sondaı-aq, onyń sózine qaraǵanda, sanaq personalymen óteýli qyzmet kórsetý sharttary jasalady.

«30 kúnge qyzmet kórsetilgen kezde daıyndyq kezeńiniń ıntervıýerine (tirkeýshige) kórsetilgen qyzmetteri úshin 75 743 teńge, sondaı-aq negizgi kezeń ıntervıýlerine (sanaqtan ótkizýshige) 94 678 teńge tóleý josparlanǵan. Al 45 kúnge qyzmet kórsetilgen kezde daıyndyq jáne negizgi kezeńderdiń nusqaýshy-baqylaýshysyna kórsetilgen qyzmetteri úshin 113 614 teńge aqy tólenbek», - deıdi Nurbolat Aıdapkelov.