2008-2009 jyldary Aýǵanstanda esirtki egistikteri 41 paıyzǵa azaıdy - Aýǵanstan ishki ister mınıstriniń orynbasary
dep habarlaıdy QazAqparat.
Kezdesýde esirtkimen kúreste Aýǵanstannyń quzyrly organdarymen áriptestik ornatý jáne transulttyq esirtki qylmysymen kúres máseleri talqylandy. Otyrysqa qos uıym ókilderi men qatar Aýǵanstannyń ishki ister mınıstriniń orynbasary, esirtkiniń zańsyz aınalymymen kúres jónindegi departamentiniń bastyǵy, general-maıor Mohammad Daýd qatysty.
Esirtkiniń zańsyz aınalymymen, psıhotropty zattarmen kúres jónindegi Ortalyq Azııa aımaqtyq aqparattyq úılestirý ortalyǵynyń dırektory, general-leıtenant Beksultan Sársekovtyń aıtýynsha, búgingi otyrys Aýǵanstanmen atalǵan máselede áriptestik ornatýdyń naqty kezeńine kóshkenin kórsetedi. «General Mohammad Daýd Aýǵanstan úkimetiniń bizdiń ortalyqtyń baqylaýshysy bolý týraly resmı usynys jasaıtynyn jetkizdi. Bul esirtkimen kúreste bizge qosymsha múmkindikter beredi», deıdi B.Sársekov.
Aýǵanstan úkimeti ókiliniń aıtýynsha, qazirgi tańda esirtkiniń zańsyz aınalymymen kúres Aýǵanstan úshin eń basty máseleniń biri. Sondyqtan kórshiles eldermen birlese is-qımyldar jasaý kózdelgen. «Bul baǵytta biz Qazaqstandy basty áriptes dep bilemiz. Birlese is-qımyl jasaý arqyly biz esirtki jolyna jáne basqa da qylmystarǵa tosqaýyl qoıa alamyz. Qazirgi tańda álemdegi basty qaýip, ol terrorızm men esirtki», dep atap ótti M.Daýd. Onyń aıtýynsha, Aýǵanstan esirtkimen kúreste halyqaralyq uıymdarmen de áriptestikti arttyryp otyr. Máselen, NATO qurylymdarymen birlesken sharalar nátıjesinde 2 kún buryn ýálaıattardyń birinen 12 tonna esirtki shıkizaty men 110 kılá geroın tárkilengen. M.Daýdtyń aıtýynsha, BUU jarııalaǵan aqparat boıynsha 2008-2009 jyldary Aýǵanstandaǵy esirtki egistikteri 41 paıyzǵa azaıǵan. Qazirgi tańda tálibter qonystanǵan 4 ýálaıatta ǵana esirtki egistikteri bar. Buryn 30 ýálaıatta esirtki egilip kelgen edi.