2005-2007 jyldardaǵy Memlekettik turǵyn úı baǵdarlamasy boıynsha Astanada berilýi tıis úılerdiń qurylysy keler jyldyń basynda aıaqtalady - I.Tasmaǵambetov

ASTANA. Jeltoqsannyń 3-i. QazAqparat /Gúlmıra Álıakparova/ - 2005-2007 jyldarǵa arnalǵan Memlekettik turǵyn úı baǵdarlamasy boıynsha Astana qalasynda berilýi tıis bolǵan turǵyn úı keshenderi 2010 jyldyń birinshi toqsanynda tolyǵymen paıdalanýǵa beriledi.

Bul týraly búgin «Nur Otan» HDP Astana qalalyq fılıalynda partııanyń Halyqtyq tuǵyrnamasynyń, «Jol kartasy» men «100 mektep, 100 aýrýhana» baǵdarlamalarynyń oryndalýy barysy týraly esep bergen Astana qalasynyń ákimi Imanǵalı Tasmaǵambetov málim etti, dep habarlaıdy QazAqparat.

«Nur Otan» partııasynyń qalalyq fılıaly ǵımaratynda ótip jatqan esep berý keńesinde Astana ákimi, qalada Memlekettik turǵyn úı baǵdarlamasy eki kezeńmen júzege asyrylyp otyrǵandyǵyn atap ótti. Onyń 2005-2007 jyldarǵa baǵyttalǵan birinshi kezeńinde, jalpy aýmaǵy 165 myń sharshy metrdi quraıtyn eki turǵyn úı kesheniniń qurylysy aıaqtalmaı qaldy.

«Baǵdarlama kestesiniń belgilengen merzimnen aýytqýynyń sebebi - kezinde bul nysandardyń qaýqarsyz salýshylarǵa berilýinde. Uzaq ýaqyt júrgizilgen sot tekseristerinen keıin, úı salýshylarǵa nysandy aıaqtaý merzimi belgilendi. Biraq qarjylandyrýdyń bolmaýynan nysandar turalap qaldy. Degenmen, sońǵy eki jylda biz bul máseleni sheshý joldaryn qarastyrdyq. Búginde olar tolyǵymen sheshildi. 2005-2007 jyldarǵa arnalǵan Memlekettik baǵdarlamanyń nysandary keler jyldyń birinshi toqsanynda paıdalanýǵa beriletin bolady», - dep atap ótti ol.

Ákim 2008-2010 jyldarǵa arnalǵan Memlekettik baǵdarlama boıynsha Astanada boı kóterip jatqan turǵyn úı keshenderi sondaı-aq, 2010 jyly tapsyrylatynyn jetkizdi.