200 jyldyq arba, qamystan jasalǵan sandyq: Qyzylordada muǵalim mektepten mýzeı ashqan

<p>QYZYLORDA. KAZINFORM - Qyzylorda qalasyndaǵy №235 orta mektepte jarty ǵasyrdan beri taban aýdarmaı eńbek etip kele jatqan Kúlásh Almatshaeva tarıhı jádigerlerdi jınaýmen aınalysady. Qazirgi kúni jasy jetpisten asqan ol kisi mektepte &laquo;Atameken&raquo; mýzeıine jetekshilik etedi.</p>

Qazirgi tańda mýzeıde tarıhy 200 jyldan asatyn arba, qamystan jasalǵan sandyq, sııaly qalam, portfel, maıshamdar tur. Olardyń jalpy sany 2 myńǵa jýyq. Olardyń keıbirin qarapaıym muǵalim óz qarjysyna satyp alǵan.

Foto: keıipkerden

Áriptesteri arasynda «Mýzeı apa» atanyp ketken ol kisi bul isimen qalaı aınalysqany jóninde aıtyp berdi. Bilim oshaǵy ashylǵan 1972 jyly sımvolıkalyq kiltti 23 jastaǵy jas maman retinde ustaz retinde oǵan tabys etken.

«Kiltti ózimde biraz saqtap júrdim. Bul aýmaqta mektepten basqa eshqandaı úı, ǵımarat joq edi. Sol ýaqytta qyzyǵýshylyǵym oıanyp, qurylysshylardyń mektep salyp jatqan sátin sýretke túsirip aldym. Ony bolashaqta qajet bolar degen oımen arnaıy orynǵa saqtap qoıdym. Mektep dırektory Rahat Qultanov maǵan mektep jáne ujym jaıynda málimet jınaýǵa tapsyrma berdi. Mektep basshylyǵy qoldaý kórsetti, oılaǵan maqsatymyzǵa jettik. Búginde bizdiń qorymyzda 1972 jyldan bergi mektep basshylary, muǵalimderi, túlekter týraly tolyq derek jınaqtalǵan», - dedi mýzeı meńgerýshisi.

Mýzeımen tanysqan sátte ol jerden eń alǵashqy qońyraý, sııaly qalam, Keńes odaǵy kezindegi oqýshy partasy, portfel, oblystyń eń alǵashqy telefon anyqtamalyǵyn kórýge bolady. Oǵan qosa ulttyq dúnıeler, mýzykalyq aspaptar, ydys-aıaq jáne taǵy basqa kóne jádigerler kópshiliktiń erekshe qyzyǵýshylyǵyn týǵyzady. Mektepke aty berilgen Kómekbaı Qarakózov paıdalanǵan turmystyq buıymdar da saqtaýly tur.

Foto: keıipkerden

Ol kisiniń aıtýynsha, eń qundy jádiger retinde kıiz úı men arba saqtalǵan. Eki ǵasyrǵa jýyq tarıhy bar arba atqa da, túıege de, ógizge de arnalǵan.

Kóne arbany oǵan uly satyp alyp bergen eken. Anasynyń erekshe qyzyǵýshylyǵyna balasy da qoldaý bildirgen. Tipti nemereleri de ájesine kóne tıyn taýyp alsa da ákep berip jatady.

«Alash arystary Mustafa Shoqaı, Sáken Seıfýllın ustaǵan portfeldermen tanysýǵa bolady. Qazaqstannyń Halyq artısi, kıno jáne teatr qaıratkeri Ámına Ómirzaqovanyń «Taqııaly perishte» fılminde tartqan shálisi toqylǵan apparatty Orynbordan alyp keldim. Qaı jerge barsam da qur qaıtpaımyn. Osyndaı erekshe, eski dúnıe izdep, taýyp, satyp alamyn», – deıdi K.Almatshaeva.

Mektep mýzeıinde besik, sandyq, útik, maısham, qolsaǵat, qabyrǵa saǵattarynyń evolıýtsııasyna kezigesiz. Ár kezeńde paıdalanylǵan turmystyq dúnıeler zamannyń jyljyp, tehnologııanyń jetilgenin kóz aldyńa ákeledi.

Tarıhı jádigerlerdiń janashyry kóp jylǵy jınaǵan dúnıelerdiń birshama bóligin 50 shabadanǵa salyp saqtap qoıǵan. Olardyń arasynda eń eskisi 1941 jyly Almatyda jasalǵany alystan menmundalap tur.

K.Almatshaeva mektepte orys tili men ádebıeti pániniń muǵalimi bolyp qyzmet etken. Odan bólek, qoǵamdyq jumystarǵa belsene aralasqan.

Eske salsaq, budan buryn Syr boıyndaǵy kóne qala Qumııan jaıynda jazǵan edik.