200 km/saǵ jyldamdyqpen júretin jolaýshylar lokomotıvi synaqtan sátti ótti - QTJ (FOTO)

ASTANA. QazAqparat - Saǵatyna 200 shaqyrym jyldamdyqpen júre alatyn «KZ4AT» elektrovozy Kıik-Moıynty jol teliminde synaqtan ótkizildi, dep habarlady «Qazaqstan Temir joly» UK» AQ baspasóz qyzmetinen.

Jańa úlgidegi bir sektsııaly kóp mindetti atqara alatyn lokomotıv qazaqstan temir jolynda rekordtyq jyldamdyqpen júrip ótti.

Alstom kompanııasynyń lokomotıvi álemniń túkpir-túkpirinde qoldanysta júr.

Jańa tehnıka «Qazaqstan temir joly» UK» AQ tehnıkalyq jáne GOST standarty men sertıfıkaty talaptaryna sáıkes keledi.

Elektrovozdyń syrtqy keskini sulý ǵana emes, ishki dızaıny da óte jaıly ári kórnekti. Mashınıst pen kómekshisiniń kabınasynda barlyq jaǵdaılar jasalǵan. Jylýdy baqylaý qondyrǵysy, oryndyqty jylytý júıesi, edendi jylytý, mıkrotolqyndy pesh, tońazytqysh, dárethanasy da bar.

Synaqqa qatysqan lokomotıv brıgadasy jańa elektrovozdyń múmkindigin joǵary baǵalady. «QTJ-Júk tasymaly» AQ-nyń «Qaraǵandy lokomotıv paıdalaný deposy» fılıalynyń mashınıst- nusqaýshysy Nurlan Seıitov, 1-synypty mashınısi Sergeı Sotnıkov jáne mashınıst kómekshisi Ilıa Ýrıýmtsev KZ4AT elektrovozyn lokomotıv ataýlynyń flagmany dep tanydy.

«Saǵatyna 200 shaqyrym jyldamdyqpen júrgen kezde qysymnyń azdaǵan joǵarylaýy baıqalady. Bul áli úırenbegendikten sekildi. Sebebi, qazirgi jolaýshylar poıyzdarynyń eń joǵarǵy jyldamdyǵy saǵatyna 140 shaqyrymnan aspaıdy. Mundaı jyldamdyqpen «Tulpar-Talgo» poıyzy Astana men Almaty arasynda jolaýshylardy tasymaldaıdy. Al, saǵatyna 200 shaqyrym jyldamdyqpen qazaqstandyq mashınıster áli júrip kórgen joq. Bul máselede biz alǵashqylarmyz!»,-deıdi keýdesin maqtanysh kernegen mashınıst pen onyń kómekshisi.

«Biz Qazaqstan temir jolynyń tarıhynda saǵatyna 200 shaqyrym jyldamdyqpen júrý synaǵyn sátti ótkizgenimizge qýanyshtymyz. Mundaı rekordtyń bolashaǵy zor. Sebebi, Qazaqstannyń ekonomıkalyq damýy men Eýropany, Qıyr Shyǵys, Azııa jáne Reseımen Uly Jibek joly arqyly jalǵaýynyń kóliktik dálizine jol ashatyndyǵyn kórip otyrmyz»,-dep atap ótti Alstom kompanııasynyń TMD aýmaǵy Ońtústik klasteriniń basqarýshy dırektory Bernard Pell.

Qazaqstanda mundaı úlgidegi lokomotıvterdi kúzde Astanadaǵy «Elektrovoz qurastyrý zaýyty» kásipornynda qurastyryla bastaıdy.