200-ge jýyq qostanaılyq jas «Rýhanı jańǵyrý» logotıpin beıneledi

QOSTANAI. QazAqparat - A.Baıtursynov atyndaǵy Qostanaı memlekettik ýnıversıteti alańyna óńirdiń joǵary oqý oryndary men kolledjderinen 200-ge jýyq stýdent jıyldy. Olarǵa Jastar resýrsy ortalyǵynyń eriktileri de qosyldy, dep habarlaıdy QazAqparat.

Qatysýshylar bı bıleý barysynda sapqa tizilip, «Rýhanı jańǵyrý» logotıpin beıneledi. Jastar resýrsy ortalyǵynyń jetekshisi Aıgúl Abdýllınanyń aıtýynsha, Qostanaı jastary bul fleshmob arqyly Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn qoldaıtynyn jetkizgisi keldi.

«Osyndaı sharalar jastardy biriktire túsedi jáne boılaryna patrıottyq sezim uıalatady. Biz bes tústi jeıde kıgen jastardyń bı qımyldary arqyly  «Rýhanı jańǵyrý» logotıpin beınelep, odan soń «Qostanaı» jazýyn kórsettik», - dedi ortalyq jetekshisi.

Fleshmob kvadrokopterdiń kómegimen bıiktikten túsirildi.