200-ge jýyq arystyq ardager saýyqtyrý oryndaryna attandy

ARYS. QazAqparat - Túrkistan oblysynyń ákimi Ómirzaq Shókeevtiń bastamasymen búgin 200-ge jýyq arystyq ardager «Meıir Ardagerler úıine» attandy. Bul jóninde oblys ákiminiń baspasóz qyzmetine silteme jasap QazAqparat habarlaıdy.

Atalǵan bastama Arys qalasynyń zeınetkerlerin áleýmettik qoldaý maqsatynda uıymdastyrylyp otyr. Onda ardagerlerge túrli medıtsınalyq qyzmetter kórsetiledi. Atap aıtqanda, fızıoterapııalyq, parafınmen, ozokerıtpen emdeý, dene shynyqtyrý, dári egý syndy em-dom kórsetiledi. Demalýshylar kúnine 4 mezgil tamaqtanady. Jalpy demalý merzimi - 15 kún. Sondaı-aq, demalýshy ardagerlerdiń qatysýymen kúndelikti kontserttik baǵdarlamalar ótkiziletin bolady.

Aıta keterligi, Arys qalasynda 3900-den astam zeınetker turady. Búgin 8 shildede «Meıir Ardagerler úıine» 190 zeınetker attansa, 9 shildede «Ardagerler úıine» 200 zeınetker joldanady. Jalpy shilde-tamyz aılarynda barlyǵy 1360 zeınetker qamtylady.