200-den astam sot sarapshysy shetelde biliktiligin arttyrdy
Bul jaıynda QR Ádilet mınıstri Marat Beketaevtyń Májilis depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.
«Básekege qabiletti kadrlar daıarlaý mınıstrliktiń basym baǵyttarynyń biri bolyp qalýda. Osyǵan qaraı kásiptiń mártebesin kóterý jumystary jalǵasyp keledi. Sot saraptamalary ortalyǵy sot sarapshylarynyń biliktiligin arttyrý jáne qaıta daıarlaý maqsatynda elimizdiń jáne jaqyn shetelderdiń joǵary oqý oryndarynda 240 sot sarapshysy oqytyldy», - dedi ol.
Mınıstrdiń aıtýynsha, «Bolashaq» halyqaralyq baǵdarlamasy aıasynda 2014 jyldan bastap 2019 jylǵa deıin Sot saraptamalary ortalyǵynyń 54 sot sarapshysy Ulybrıtanııada ǵylymı taǵylymdamadan ótti. Taǵy 16 sot sarapshy 2020 jyldyń aqpan aıynda oqýlaryn bastaıdy. Kadrlardy irikteý maqsatynda Jumyspen qamtý ortalyqtarymen yntymaqtastyq jáne medıtsınalyq joǵary oqý oryndarynyń jyl saıynǵy jármeńkelerine qatysý júzege asyrylady.
«20 jas maman rezıdentýrada jáne medıtsınalyq joǵary oqý oryndarynyń magıstratýrasynda oqytýdan ótýde. Olar keıin ınstıtýttarǵa jumysqa ornalastyrylatyn bolady. Odan basqa, Dúnıejúzilik banktiń jobasy aıasynda 2017-2019 jyldary 213 sot sarapshysy 18 baǵyt boıynsha Ulybrıtanııada, Izraılde, Lıtvada, BAÁ, Reseıde, AQSh-ta jáne Túrkııada biliktilikti arttyrý kýrstarynan ótti.
Sot sarapshylarynyń biliktiligin arttyrý maqsatynda Sot saraptamalary ortalyǵy Qazaqstannyń jetekshi joǵarǵy oqý oryndarymen turaqty negizinde jumys isteıdi.
Olar: L.Gýmılev atyndaǵy Eýrazııalyq ulttyq ýnıversıteti, Ál-Farabı atyndaǵy Qazaq ulttyq ýnıversıteti, M.Nárikbaev atyndaǵy «QazMZÝ ýnıversıteti» AQ, Nur Sultan, Semeı jáne t.b. qalalarynyń medıtsınalyq joǵarǵy oqý oryndary», - dep atap ótedi Marat Beketaev.