200-den astam adam Reseıden koronavırýs juqtyryp kelgen - SQO

PETROPAVL. QazAqparat - Soltústik Qazaqstan oblysynda KVI juqtyrǵandardyń ishinde syrttan kelýshiler kóbeıgen, dep habarlaıdy QazAqparat.

Koronavırýsqa qarsy vedomstvoaralyq komıssııanyń málimetine sensek, syrttan indet juqtyryp ákelgenderdiń basym bóligi - Reseı Federatsııasynan kelgen Qazaqstan azamattary.

Máselen, 16 jeltoqsanda Reseımen shekaralas avtomobıl joldaryndaǵy shekaralyq baqylaý beketterinen 502 adam ótken (Jańa jol beketi - 230 adam, Qaraqoǵa beketi - 223 adam, Bıdaıyq beketi - 49 adam).

Jaıaý jolaýshylardyń 188-de PTR taldaýdyń teris nátıjesi kórsetilgen anyqtama bolǵan.

Anyqtamasyz kelgen 25 Qazaqstan azamaty karantın statsıonaryna jatqyzylyp, PTR ádisimen COVID-19-ǵa testilengen.

PTR testileý nátıjesi boıynsha bir jolaýshydan koronavırýs ınfektsııasy anyqtalǵan.

6 qazan men 16 jeltoqsan aralyǵynda Reseımen shekaralas avtomobıl joldaryndaǵy UQK shekara baqylaý beketterinen 37 125 adam ótken.

Onyń ishinde 9 785 adamda PTR testileýdiń teris nátıjesi kórsetilgen anyqtama bolǵan. 2 081 QR azamaty anyqtama bolmaǵandyqtan karantın statsıonaryna jatqyzylǵan.

PTR nátıjesinde 206 adamnyń COVID-19 juqtyrǵany anyqtalyp, 21 adam ınfektsııalyq statsıonarǵa jatqyzylǵan jáne 185 adam ambýlatorııalyq jaǵdaıda emdelýde.

Sonymen qatar, PTR-anyqtamasy joq 256 shetel azamatyna QR aýmaǵyna kirýine tyıym salyndy.