20 jeltoqsanda Qostanaı oblysynan Senatqa saılaý ótedi

<p>Bıylǵy 20 jeltoqsanda Parlament Senatynyń Qostanaı oblysynan shyǵyp qalǵan depýtatynyń ornyna saılaý ótedi. Tıisti sheshim búgin Ortalyq saılaý komıssııasynyń otyrysynda qabyldandy, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

Saılaý zańnamasyna sáıkes Senat depýtattary jasyryn daýys berý arqyly janama saılaý quqyǵy negizinde saılanady. Daýys berýge tek máslıhat depýtattary ǵana qatysady.

Kandıdattardy usyný máslıhattardyń sessııalarynda, sondaı-aq ózin-ózi usyný tártibimen júzege asyrylady. Óz ókilderi arqyly máslıhattarda kandıdattardy saıası partııalar men qoǵamdyq birlestikter usynýǵa múmkindigi bar.

Konstıtýtsııaǵa jáne zańnamaǵa sáıkes joǵary bilimi jáne keminde bes jyl jumys ótili bar, sondaı-aq bizdiń elimizdiń aýmaǵynda sońǵy 10 jáne ózi ókili bolyp tabylatyn óńirde (ıaǵnı Qostanaı oblysynda) keminde 3 jyl turaqty turatyn, 30 jastan asqan Qazaqstan azamaty Senat depýtaty bola alady.

Parlament Senatynyń depýtattyǵyna kandıdat retinde tirkelý úshin úmitker oblystyń barlyq máslıhattary depýtattarynyń jalpy sanynyń keminde on paıyzynyń qoldaýyn alýy qajet.

Kandıdat úshin saılaý jarnasy 1 050 000 teńgeni quraıdy.

Budan basqa, kandıdat pen onyń jubaıy (zaıyby) tirkelgenge deıin turǵylyqty jeri boıynsha salyq organdaryna aktıvteri men mindettemeleri týraly deklaratsııa tapsyrýǵa mindetti.

Senat depýtattyǵyna kandıdattardy usyný 21 qazannan bastalyp, 19 qarasha saǵat 18.00-ge deıin jalǵasady. Kandıdattardy tirkeý 29 qarashada saǵat 18.00-ge deıin ótedi, al saılaýaldyndaǵy úgit 2023 jylǵy 29 qarashada jergilikti ýaqyt boıynsha saǵat 18-den keıin bastalyp, 19 jeltoqsan saǵat 00.00-de aıaqtalady.

Daýys berý nátıjesin Qostanaı oblysynyń aýmaqtyq saılaý komıssııasy bir kúnde – 20 jeltoqsanda jarıalaıdy.

Ortalyq saılaý komıssııasy saılaý qorytyndysyn jeti kúnnen – 26 jeltoqsannan keshiktirmeı belgileıdi.