20 jastaǵy kıberalaıaq astanalyqtar 10 mln teńge alǵan

NUR-SULTAN. QazAqparat – Nur-Sultan polıtseıleri aqparattyq tehnologııalar salasyndaǵy qylmystardy anyqtaý baǵytynda belsendi jumys júrgizýde, dep habarlaıdy QazAqparat Nur-Sultan qalasynyń Polıtsııa departamentiniń baspasóz qyzmetine silteme jasap.

Elordada osy jyldyń 9-15 tamyzy aralyǵynda «Anti Fraud» jedel-aldyn alý sharalary ótýde. Onyń maqsaty – kıberqylmystardy boldyrmaý, olardyń aldyn alý jáne anyqtaý.

Krımınaldyq polıtsııa qyzmetkerleri Elordada eki kún ishinde aqparattyq tehnologııalar salasyndaǵy 18 qylmysty anyqtap, buryn jasalǵan taǵy 20 qylmysty ashyp, segiz kúdikti ustaldy.

Osylaısha, 20 jastaǵy Túrkistan oblysynyń turǵyny «Instagram» áleýmettik jelisi arqyly aqshany aınalymǵa salamyn dep ýáde berip, astana turǵyndarynyń 10 mıllıon teńgesin qoldy qylǵan. Odan bólek, uqsas qylmys jasaǵany úshin 38 jastaǵy elordalyq áıel ustaldy. Ol qala turǵyndaryna 12 mıllıon teńge kóleminde materıaldyq shyǵyn keltirgen.

Nur-Sultan qalasynyń polıtsııa departamenti ınternettegi alaıaqtyqtyń keń taraǵan túrleri áleýmettik jelilerdegi onlaın kelisimder, «olx.kz jetkizý qyzmetin» qoldanatyn qyzmetter jáne bank kartasynan aqsha urlaý ekenin eske salady.

Sonymen qatar alaıaqtardyń tuzaǵyna túsip qalmaý úshin kez kelgen aqparatty banktiń resmı koll-ortalyqtaryna habarlasyp naqtylaý kerek ekenin eskertedi. Esh jaǵdaıda bank kartalarynyń derekterin bóten adamǵa habarlamańyz. Olardyń ishinde bank qyzmetkerleri de bar. Olar kartalardyń ıelerine habarlasyp, derekter jınamaıtynyn bile júrińiz.