20 jastaǵy qaraǵandylyq haker kompanııanyń shotynan 60 mln teńge urlady dep aıyptaldy

ASTANA. QazAqparat – Qaraǵandyda iri uıymnyń bank shotynan 60 mln teńge urlaýǵa qatysy bar oblystyń 20 jastaǵy turǵyny ustaldy. Muny Іshki ister mınıstrligi krımınaldyq polıtsııa departamenti kıberqylmysqa qarsy kúres ortalyǵy bastyǵynyń orynbasary Rústem Dúısetaev aıtty, dep habarlaıdy QazAqparat tilshisi.

«Internet jelisinde alaıaqtar iri kompanııa býhgalterleriniń kompıýterine kirý úshin hakerlik baǵdarlamalardy jıi qoldanady. Mysaly, Qaraǵandy qalasynda iri uıymnyń bank shotynan 60 mln teńge urlaýǵa qatysy bar oblystyń 20 jastaǵy turǵyny ustaldy. Ol urlyq jasaý úshin qaýipti baǵdarlama qoldanǵan. Onyń qatysýshylaryn, sondaı-aq olar jasaǵan basqa da qylmystardy anyqtaý sharalary qabyldandy», - dep oqıǵanyń mán-jaıyna toqtaldy Rústem Dúısetaev.

Sondaı-aq, alaıaqtyq jolmen alynǵan aqshany qolma-qol qarjyǵa aıyrbastap, qylmyskerlerge kómektesken Reseı azamaty ustalǵan.

«Aqmola oblysynyń polıtsııa departamentiniń qyzmetkerleri Reseı Federatsııasynyń azamatyn ustady. Ol bank qyzmetkerleriniń atynan alaıaqtyq jasaǵan kezde azamattardan urlanǵan aqshany qolma-qol aqshaǵa aınaldyrýǵa kómektesken. Atalǵan kúdiktiniń 25 qylmys jasaǵany áshkerelendi, jalpy shyǵyn 100 mıllıon teńgeden asady», - dedi Rústem Dúısetaev.

Sondaı-aq, jyl basynan beri elimizde 12 myńnan astam ınternet-alaıaqtyq qylmysy tirkelgen.

«Búginde ınternetsiz ómirdi elestetý múmkin emes. Onlaın qyzmetter ómirdiń barlyq salalarynda keńinen qoldanysqa endi. Ókinishke oraı, muny qylmyskerler de belsendi qoldanady, ásirese ınternet-alaıaqtyǵyn jasaýǵa paıdalanady. Jyl basynan beri elimizde osyndaı 12 myńnan astam qylmys tirkeldi. Olardy ashýdyń kúrdeliligi transshekaralyq sıpatqa baılanysty. Halyqty aldap, aqshasyn qaǵyp júrgen alaıaqtar kóbine eldiń basqa aımaǵynda nemese shetelde bolady. Osyǵan baılanysty, atalǵan qylmys túrleriniń aldyn alý jáne ashý úshin bıyl 16-18 tamyz aralyǵynda respýblıka aýmaǵynda «Hi-tech» jedel-aldyn alý is-sharasy ótkizildi. Onyń úshinshi kúninde 200 qylmys tirkeldi. Sondaı-aq buryn jasalǵan 339 alaıaqtyq anyqtaldy», - dedi Rústem Dúısetaev.

Spıker málimdegendeı, alaıaqtyq qylmystar kóbine onlaın saýda kezinde jasalady.

«Ádette alaıaqtar qurbandaryna arzan baǵa usynady nemese taýardy tez jetkizemiz dep aldaıdy. Satyp alýshylardan ishinara nemese tolyq aldyn-ala tólemdi ádette úshinshi tarap shottaryna salýdy suraıdy. Máselen, Almaty qalasynda Instagram áleýmettik jelisinde Iphone markaly telefondardy satý týraly habarlandyrýlar ornalastyrǵan 2 alaıaq ustaldy. Atalǵan kúdiktiler alaıaqtyqtyń 30 faktisin jasaý barysynda áshkerelendi, jalpy shyǵyn 15 mıllıon teńgeden asty», - dep málim etti Rústem Dúısetaev.