20 jasqa tolǵan adam máslıhat depýtattyǵyna kandıdat bola alady

ASTANA. QazAqparat – Eldegi 223 máslıhattyń 3415 depýtaty saılaýǵa túsedi. Bul týraly QR Ortalyq saılaý komıssııasy málim etti, dep habarlaıdy QazAqparat tilshisi.

«Máslıhat depýtattaryn saılaýǵa kelsek, Qazaqstan Respýblıkasynda ár túrli deńgeıdegi 223 máslıhat bar. Ortalyq saılaý komıssııasynyń qaýlysymen barlyq deńgeıdegi máslıhattarda mandattar sany – 3415 ekeni anyqtaldy. Olardyń barlyǵy 19 naýryzdaǵy saılaýǵa qatysady», - dedi QR Ortalyq saılaý komıssııasy tóraǵasynyń orynbasary Konstantın Petrov OSK otyrysynda.

Onyń aıtýynsha, 20 jasqa tolǵan Qazaqstan Respýblıkasynyń azamaty máslıhat depýtattyǵyna kandıdat bola alady. Oblystar, respýblıkalyq mańyzy bar qalalar, astana máslıhattarynyń depýtattary aralas saılaý júıesi boıynsha saılanady.

«Oblystardyń, respýblıkalyq mańyzy bar qalalardyń jáne astananyń máslıhattaryna depýtattardyń 50%-y majorıtarlyq júıe boıynsha, 50%-y partııalyq tizimder boıynsha saılanady. Aýdandar men qalalardyń máslıhattaryna saılaý tolyǵymen majorıtarlyq júıede ótedi. Eger máslıhatta 30 depýtattyq mandat bolsa, onyń 15-i partııalyq tizim boıynsha jáne 15-i aýmaqtaǵy birmandatty aýmaqtyq okrýgter boıynsha saılanatyn bolady», - dedi Konstantın Petrov.