20 tamyzda Baıqońyrdan brıtanııalyq One Web spýtnıkteri ushyrylady

BAIQOŃYR. QazAqparat – «Baıqońyr» ǵarysh aılaǵynda brıtanııalyq One Web spýtnıkteriniń kezekti partııasyn ushyrýǵa daıarlyq jumystary júrgizilip jatyr, dep habarlaıdy QazAqparat.

«Quramynda OneWeb apparattary, «Fregat» údetkish blogy jáne bas aǵyzǵyshtan turatyn bas bólikti qurastyrý jumystary aıaqtaldy. Ushyrýǵa daıarlyqtyń kelesi kezeńi - «Soıýz-2.1b» zymyran-tasyǵyshymen biriktirý úshin bas bólikti № 31 alańnyń tehnıkalyq keshenine tasymaldaý», - dep málim etti Roskosmostyń baspasóz qyzmetinen.

Buǵan deıin habarlanǵandaı, OneWeb spýtnıkteriniń jańa partııasy Baıqońyrǵa 2021 jyldyń 30 shildesinde jetkizildi. OneWeb-tiń 34 ǵarysh apparatyn ushyrý Baıqońyr ǵarysh aılaǵynyń 31-shi alańynyń «Vostok» ushyrý kesheninen 2021 jyldyń 20 tamyzyna josparlanǵan.