20 naýryz Qazaqstan qaharmandarynyń kúni bolýy kerek - Baqytjan Ertaev

ASTANA. QazAqparat - Parlament Májilisiniń depýtaty Baqytjan Ertaev Elbasy Nursultan Nazarbaevqa «Halyq qaharmany» ataǵy berilýine baılanysty pikir bildirdi, dep habarlaıdy QazAqparat tilshisi.

Depýtat Astananyń ataýyn Nursultan dep ózgertý bastamasy 2015 jyly kóterilgenin eske saldy.

«Biraq Elbasy salmaqtylyq tanytyp, buǵan qoldaý bildirmedi. QR Prezıdenti Qasym-Jomart Toqaevtyń usynysymen laıyqty bastamaǵa qoldaý jasaldy», - dedi B. Ertaev «QazAqparat» agenttigine bergen suhbatynda.

Sonymen qatar depýtat jastardyń patrıottyq tárbıesinde 20 naýryz Qazaqstan qaharmandarynyń kúni bolýy kerek degen usynysyn aıtty.

«Nursultan Ábishuly prezıdenttik ókilettigin toqtatsa da, biz úshin Elbasy bolyp qala beredi. Elordaǵa Elbasynyń esimin berý bastamasyna qoldaý jasalǵanyna barsha Qazaqstan halqyna quttyqtaýymdy aıtqym keledi. Maǵan kezinde Elbasy «Halyq qaharmany» ataǵyn bergen ýaqytta, barlyq jaýynger sarbazdardyń atynan alǵysymdy aıtqan edim. Osy oraıda keshe Nursultan Nazarbaevqa osy ataq berilgen sátte qatty súısindim. Elbasy nómir birinshi «Halyq qaharmany» atandy. Meniń oıymsha, jastardyń patrıottyń tárbıesi jolynda 20 naýryz Qazaqstan qaharmandarynyń kúni bolýy kerek», - dedi Ertaev.

Esterińizge sala keteıik, 20 naýryz kúni Respýblıka Prezıdenti Qasym-Jomart Toqaev QR Tuńǵysh Prezıdenti - Elbasy Nursultan Nazarbaevqa «Halyq qaharmany» ataǵyn berdi.

Budan buryn habarlanǵandaı, Prezıdent mindetin ýaqytsha atqarýǵa kirisken Qasym-Jomart Toqaev Astana qalasynyń ataýyn Nursultan dep ózgertý týraly usynys jasaǵan bolatyn.

Parlament Astananyń ataýyn Nursultan dep ózgertý týraly qujatty qabyldady.