20 myń teńgege kólik satpaq bolǵan ınternet-alaıaq ustaldy - Qostanaı oblysy

QOSTANAI. QazAqparat - Qostanaılyq polıtsııa qyzmetkerleri ınternet arqyly alaıaqtyq jasaǵan 8 kúdiktini anyqtady, dep habarlaıdy QazAqparat.

Qostanaı polıtseıleri Pavlodar, Kókshetaý, Qaraǵandy, Almaty qalalarynda jáne Almaty oblysynda qylmys jasaǵan kúdiktilerdi ustady. Qostanaı oblysynyń turǵyndary olarǵa taýarlardy nemese nesıelerdi rásimdeýde deldaldyq jasaǵany úshin aqsha aýdaryp kelgen.

«Búginde alaıaqtar túrli aldaý tásilderin qoldanady. Aldymen hat almasyp, senimge kirgen soń aqsha ala bastaıdy. Turǵyndar kóbine Kolesa.kz, Krisha.kz, OLX.kz ınternet-platformalarynda aldanyp qalady. Jyljymaıtyn múlik, avtobólshekter, kıim alǵysy keletinder «satýshynyń» qurbanyna aınalyp shyǵa keledi», - dep túsindirdi oblystyq polıtsııa departamentiniń baspasóz qyzmetindegiler.

Máselen, 22 jastaǵy oblys turǵyny qolaıly baǵadaǵy avtobólshekter úshin alaıaqqa 110 myń teńge aýdarǵan, alaıda ýáde etilgen taýar jetkizilmegen. Polıtseıler bul iske qatysy bar kúdiktini ustady. Sotqa deıingi tergep-tekserý sharalary bastaldy.

Polıtsııada atap ótkendeı, adamdar kóbine qymbat emes avtokólikterdi satý týraly jalǵan habarlandyrýlarǵa urynyp qalady.

«Almaty turǵyny alaıaqtardyń KASPI GOLD kartasynyń shotyna Lexus markaly avtokólikti satyp alý úshin 20 myń teńge aldyn ala tólem jasaǵan. 28 jastaǵy kúdikti kólikti Qostanaı qalasynda satpaq bolyp, satyp alýshyny shaqyrǵan. Biraq, jábirlenýshi Qostanaı qalasyna kelip, jalǵan satýshymen baılanysa almaǵan. Alaıaq Kolesa.kz saıty arqyly jymysqy áreketin iske asyrdy. Kóp uzamaı ol Qaraǵandy qalasynda qolǵa tústi», - delingen polıtsııa departamenti taratqan habarlamada.

Sonymen qatar, taǵy bir Qostanaı turǵyny Instagram jelisindegi «bakyt__bets» akkaýntynyń qurbany boldy. Alaıaq 20 jastaǵy Qapshaǵaı qalasynyń turǵyny bolyp shyqty. Ol áleýmettik jeli arqyly aqsha qarajatyn aınaldyrýmen aınalysqan. Jábirlenýshi onyń esepshotyna 12800 teńge aýdarǵan.

Barlyq faktiler boıynsha QR Qylmystyq kodeksiniń 190-baby («Alaıaqtyq») boıynsha sotqa deıingi tergeý júrgizilýde.

Polıtseıler ınternet arqyly qandaı da bir taýardy satyp alý kezinde azamattardy qyraǵy bolýǵa shaqyrady.