20 myń qazaqstandyqtyń ıpotekalyq qaryzy qaıta qarjylandyryldy

ALMATY. QazAqparat - Almatyda «Nur Otan» partııasy turǵyn úı zaımdaryn qaıta qarjylandyrý boıynsha kóshpeli qabyldaý ótkizdi, dep habarlaıdy QazAqparat tilshisi.

QR Ulttyq banki men ekinshi deńgeıli 13 banktiń ókilderi, sondaı-aq QR bank ombýdsmeni Erserik Sıyrbaev Qazaqstannyń ár óńirindegi azamattardy onlaın-rejimde qabyldady.

QR Ulttyq bankiniń Qarjylyq qyzmette tutynýshylardyń quqyǵyn qorǵaý jáne syrtqy kommýnıkatsııalar basqarmasy tóraǵasynyń orynbasary Iman ál-Keısıdiń aıtýynsha, qaıta qarjylandyrý baǵdarlamasy aıasynda jalpy somasy 112 mlrd teńgege 20 myń qaryz qaıta qarjylandyrylǵan.

«Qaıta qarjylandyrý baǵdarlamasy 2005 jyldan beri júrgizilip keledi. Osy ýaqyt aralyǵynda jalpy somasy 112 mlrd teńgege 20 myń qaryz qaıta qarjylandyrylǵan. Jalpy aıtsaq quny 135 mlrd teńgeden asatyn 23 myń qaryz maquldandy. Atalǵan baǵdarlamanyń arnaıy sharttary bar. Ipoteka 2004-2009 jyldary alynýy tıis. Sondaı-aq, ol adamnyń jalǵyz baspanasy bolýy shart. Tólenbegen borysh somasy 36 mln teńgeden aspaýy kerek. Keı tutynýshylarmen arada túsinispeýshilik týady. Kópshiligi barlyq shartqa sáıkespeı jatady. Sondyqtan, banktermen arada osyndaı jumystar atqarylyp turýy durys dep oılaımyn», - dedi Iman ál-Keısı.

Mamandar ıpotekalyq turǵyn úı qaryzdaryn qaıta qarjylandyrý aıasyndaǵy memlekettik baǵdarlamanyń sharttary boıynsha túsindirý jumystaryn júrgizdi.

«Nur Otan» partııasy respýblıkalyq qoǵamdyq qabyldaý bóliminiń meńgerýshisi Jumajan Júkenovtiń aıtýynsha, ótken jyly memlekettik organdar 23 myń adamnyń ótinishin qarasa, onyń jartysynan astamy Ulttyq banktiń jetekshilik etetin salasyna qatysty bolyp shyqqan.

«Búgingi kúni azamattardy tolǵandyratyn negizgi máselelerdiń biri ıpotekalyq nesıe alý, onymen birge ulttyq valıýtadaǵy nesıe resýrstarynyń qoljetimdiligi bolyp otyr. Máselen, ótken jyly bizge 230 myń adam ótinishpen kelse, onyń jartysynan astamy ulttyq banktiń jetekshilik etetin salasyna qatysty bolyp otyr. Turǵyn úı qaryzdaryna baılanysty bizdiń partııa jylda kóshpeli jıyn ótkizedi. Sonyń arqasynda bank qyzmetkerleri, bank ombýdsmeni aımaqtarǵa shyǵyp máselelerdi sheship jatyr. Óıtkeni, bankterge kóp adamnyń aryzy jetpeıdi. Partııa eki aradaǵy dáneker qyzmetin atqarady», - dedi Jumajan Júkenov.

Aıta ketý kerek, kóshpeli qabyldaý barysynda azamattarǵa bilikti zańdyq kómek kórsetilip, keıbir túıtkildi máseleler partııa baqylaýyna alyndy.