20 ınnovatsııalyq mektep: Kez kelgen qazaqstandyq IT daǵdysyn tegin úırene alady

NUR-SULTAN. QazAqparat – Ulttyq jobalar aıasynda halyqqa IT daǵdylaryn tegin úıretetin 20 ınnovatsııalyq mektep ashylady. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtyp berdi, dep habarlaıdy QazAqparat.

«Baǵdarlamalaý boıynsha 20 ınnovatsııalyq mektep quramyz. Bul JOO emes, kolledj de emes, 2 jylda joǵary bilikti mamandar daıarlaı alatyn ınnovatsııalyq baǵdarlamalaý mektepteri dep atalady. Búginde elimizde dál osyndaı 2 mektep bar, onyń túlekteri Qazaqstanda otyryp-aq, jahandyq Big Tech kmopanııalarǵa jumys istep júr», - dedi mınıstr Ortalyq kommýnıkatsııalar qyzmetinde ótken baspasóz máslıhatynda.

Mınıstrdiń aıtýynsha, ınnovatsııalyq mektepterdiń damýyn yntalandyrý úshin Tech Orda baǵdarlamasy boıynsha 20 myń vaýcher bólinedi, olar kez kelgen adamǵa ınnovatsııalyq baǵdarlamalaý mektebinde tegin oqýǵa múmkindik beredi.

«Bul ınnovatsııalyq mektepterge tek qana mektep túlekteri nemese stýdentter túsedi degen talap joq, oǵan óz mamandyǵyn ózgertip, IT daǵdylaryn úırengisi kelgen kez kelgen adam túse alady», - dep túsindirdi B. Mýsın.

Aıta keteıik, Memleket basshysynyń Joldaýy aıasynda «Tsıfrlandyrý, ǵalym jáne ınnovatsııalar esebinen tehnologııalyq serpilis» ulttyq jobasy ázirlenip, bekitildi. Ulttyq joba 10 baǵyttan, 226 tapsyrmadan, 44 kórsetkishten jáne 211 is-sharadan turady, olardy iske asyrý 2025 jylǵa deıin josparlanǵan. Ulttyq joba aıasynda halyqqa qyzmet kórsetý ortalyqtary da tsıfrlyq jáne vıdeoqyzmetterin iske qosady.

Sonymen birge, Qazaqstannyń barlyq balalary ınformatıka jáne baǵdarlamalaý boıynsha sapaly bilim alýy úshin «Vırtýaldy ınformatıka muǵalimi» jobasy iske asyrylmaq.