20-dan astam muǵalimge «Qazaqstannyń eńbek sińirgen ustazy» memlekettik nagradasy tabys etildi

NUR-SULTAN. QazAqparat – Atalmysh nagrada elimizde alǵash ret berildi. Memleket basshysynyń Jarlyǵymen 20-dan astam muǵalim bilim berý salasyna sińirgen eńbegi úshin memlekettik marapatqa ıe boldy, dep habarlaıdy QazAqparat Bilim jáne ǵylym mınıstrligine silteme jasap.

Bilim jáne ǵylym mınıstri Ashat Aımaǵambetov pedagogterge memlekettik nagradany tabys etip, olarǵa alǵys bildirdi.

«Pedagogterge memleket tarapynan erekshe kóńil bólinip jatyr. Memleket basshysynyń tapsyrmasy boıynsha alǵash ret «Qazaqstannyń eńbek sińirgen ustazy« memlekettik nagradasy taǵaıyndaldy. Eńbekterińiz ben óskeleń urpaqty tárbıeleýge qosqan úlesterińiz úshin alǵys aıtamyn. Nagradalaryńyz qutty bolsyn! Sizderge myqty densaýlyq, otbasylaryńyzǵa amandyq, baq-bereke tileımin», – dedi mınıstr.

Sondaı-aq Bilim jáne ǵylym mınıstri sońǵy jyldary engizilgen oń ózgeristerge toqtalyp ótti. Máselen, jalaqynyń ósýi, esep berý pen pedagogıkalyq júktemeniń tómendeýi, oqýlyqtar men oqý baǵdarlamalaryn ázirleýge qoıylatyn talaptyń kúsheıýi, mektep dırektorlaryn taǵaıyndaý jáne pedagogterdi jumysqa qabyldaý qaǵıdalarynyń ózgerýi, pedagog mamandyǵy boıynsha oqýǵa túsýge qajet shekti upaıdyń artýy, bolashaq muǵalimderdiń aı saıynǵy stıpendııasynyń joǵarylaýy týraly da aıtyldy.

«Qazaqstannyń eńbek sińirgen ustazy» memlekettik nagradasy muǵalimderge úzdik jetistikteri men memleket aldyndaǵy erekshe eńbegi úshin beriledi. Joǵary ataqqa ıe bolǵan pedagog 1 000 AEK mólsherinde birjolǵy tólem alady.

Eńbek ardageri, ulaǵatty ustaz Orynsha Qarabalına búgingi tańda pedagog mártebesi zańmen bekitilgenin, endigi kezekte barlyǵy muǵalimderdiń ózderine baılanysty ekenin atap ótti.

«Qazaq halqy aǵartýshylar men ustazdardy tórge otyrǵyzsaq degen edi. Sol ıdeıa búgingi tańda iske asty. Qazir biz tórde otyrmyz. Muǵalimderdi qoǵam da moıyndady. Ata-ana da, oqýshy da muǵalimdersiz tálim-tárbıe ala almaıtynyn túsindi. Muǵalimderge barlyq jaǵdaı jasalyp otyr. Endi muǵalimderdiń ózine baılanysty. Sondyqtan aıtarym, ustaz osy ataqqa laıyq bolý kerek. Ol úshin muǵalimniń júris-turysy da, kıgen kıimi de, sóılegen sózi de ónege tutarlyqtaı bolý kerek. Muǵalim sondaı dárejege jetse ǵana oqýshylardyń júreginen oryn alady», – dedi Qazaqstannyń eńbek sińirgen ustazy Orynsha Qarabalına.

«Qazaqstannyń eńbek sińirgen ustazy» qurmetti ataǵyn alǵandarlyń arasynda Almaty oblysy № 1 mektep-gımnazııasynyń hımııa jáne bıologııa pániniń muǵalimi Tatıana Stankevıch bar. Ol 35 jyl oqýshylarǵa bilim bergen. Ustaz shákirtterine ekologııalyq mádenıetti úıretip, jas eriktilerdi tárbıelegen. Tatıana Stankevıch kóptegen respýblıkalyq jáne halyqaralyq baıqaýlardyń jeńimpazy jáne 2013 jyly «Úzdik pedagog» atanǵan.

«Búgin ustazdar úshin aıtýly kún. Bul elimizdegi muǵalimderdiń atqarǵan jumysyna berilgen joǵary baǵa. Oqýshynyń qolyna alǵash ret qalam ustatyp, árip tanytqan, bilim bergen muǵalimderdiń zor eńbegine kórsetilgen qurmet úshin alǵysym sheksiz», – dedi Qazaqstannyń eńbek sińirgen ustazy Tatıana Stankevıch.

Memlekettik nagradaǵa Petropavl qalasynyń M. Aıthojın atyndaǵy № 1 mektep dırektory Aleksandr Kýrlenıa da ıe boldy. Bul marapatty 40 jyldan astam eńbek ótili bar bilikti basshy búkil mektep ujymynyń eńbegi dep sanaıdy.

«Osyndaı qurmetke bólengenim úshin óte qýanyshtymyn. Bizdiń mektebimizdiń boı kótergenine bıyl 100 jyl. Bul memlekettik marapatty ujymdaǵy árbir pedagogtiń atqaryp jatqan eńbegine berilgen joǵary baǵa dep bilemin. Memleket muǵalimderge moraldyq jáne materıaldyq jaǵynan da qoldaý kórsetip keledi», – dedi Qazaqstannyń eńbek sińirgen ustazy Aleksandr Kýrlenıa.