20 tsısterna munaıdy shekaradan zańsyz shyǵarmaq bolǵandardyń joly kesildi
11:44, 15 Qazan 2022
ASTANA. QazAqparat - «Jaıyq» temir jol ótkizý pýnktinde elimizdiń aýmaǵynan munaı ónimderin zańsyz shyǵarmaq bolǵandar ustaldy, dep habarlaıdy QR Ulttyq qaýipsizdik komıtetiniń baspasóz qyzmeti.
«2022 jylǵy 8-11 qazan aralyǵynda UQK Shekara qyzmeti Batys Qazaqstan oblysynyń «Jaıyq» temir jol ótkizý pýnktinde elimizdiń aýmaǵynan munaı ónimderin zańsyz shyǵarýdyń aldyn aldy.
Jaǵar maı tıelgen 20 temirjol tsısternasy bıtýmdyq laktardy eritkish «Ýaıt-spırıt» retinde kórsetilip, júkke arnalǵan temir jol quramdarymen tasymaldanǵan» delingen habarlamada.
Málimetke saı, ustalǵan júk quzyreti boıynsha protsessýaldyq sheshim shyǵarý úshin Batys Qazaqstan oblysy boıynsha Memlekettik kirister departamentine berilgen.
Shekara qyzmeti Qazaqstandaǵy benzın, dızel otyny men munaı ónimderiniń jeke túrleriniń shyǵarylýyna ýaqytsha shekteýler qoıylǵanyn eske salady.
Foto: t.me/KNB_kz