2 saýsaǵynan aıyrylǵan aqmolalyq jumys berýshiden ótemaqy óndirip aldy

<p>KÓKShETAÝ. KAZINFORM - Aqmola oblysynda óndiris ornynda saýsaqtarynan aıyrylǵan er adam sot arqyly jumys berýshiden moraldyq ótemaqy óndirip aldy.</p>

Aqmola oblystyq soty baspasóz qyzmetiniń málimetinshe, JShS-de qurastyrýshy bolyp istegen er adamnyń jumys ústinde oń qolynyń 2 saýsaǵy julynyp ketken (ampýtatsııa).

Zardap shegýshi óndiristik jaraqattan keltirilgen moraldyq ótemaqy óndirip alý úshin sotqa júgingen. Jumys berýshi jazataıym oqıǵa jumyskerdiń abaısyzdyǵynan bolǵanyn syltaý etip, ótemaqy tóleýden bas tartqan. Alaıda, sotta jazataıym oqıǵa óndiriste bolǵany, qol qoıylǵan aktiniń bary, jumys berýshiniń 100% kinási, jazataıym oqıǵanyń saldarynan er adamnyń densaýlyǵyna ortasha zııan keltirilgeni dáleldendi.

«Atbasar aýdandyq sotynyń sheshimimen JShS-nen zardap shekken er adamnyń paıdasyna moraldyq zııan ótemaqysy, sondaı-aq ókildiń kómegine aqy tóleý jónindegi shyǵystar óndirildi. Sot sheshimi zańdy kúshine engenge deıin JShS-i sotpen salynǵan moraldyq zııan somasyn er adamǵa tolyq kólemde aýdaryp, erikti túrde sot sheshimin oryndady», - dedi vedomstvodan.

Aıta ketsek, budan buryn Aqmola oblysynda traktorshynyń ólimine baılanysty is qozǵalǵan bolatyn.