2 myńnan astam áskerı qyzmetshi koronavırýspen aýyrdy – Qorǵanys mınıstri

NUR-SULTAN. QazAqparat – QR Qorǵanys mınıstri Nurlan Ermekbaev Qarýly Kúshterdiń pandemııada qalaı jumys istegenin aıtyp berdi, dep habarlaıdy QazAqparat tilshisi.

«Armııa da – qoǵamnyń bir bóligi jáne pandemııa qarýly kúshterdi aınalyp ótken joq. Jalpy alǵanda pandemııa bastalǵan sátten beri QR Qarýly Kúshterinde bir jyl ishinde 2 myńnan astam adam vırýs juqtyryp, aýyrdy. Qazirgi ýaqytta 100-ge jýyq adam em alyp jatyr. Qaıtys bolǵandar da bar, olardyń jaqyndary men týystaryna kóńil aıtamyz. Al qalǵany aýrýdan jazyldy», - dep jaýap berdi N. Ermekbaev Ortalyq kommýnıkatsııalar qyzmetinde tilshi suraǵyna.

Mınıstrdiń aıtýynsha, Qarýly Kúshterdiń 13 myńnan astam áskerı qyzmetshisi koronavırýspen kúres jumystaryna tartylǵan.

«Máselen, Radıatsııalyq, hımııalyq jáne bıologııalyq qorǵaý bólimshesi dezınfektsııa jumystarymen aınalysty, olar indet órshigen sátte 60 mln sharshy metrden astam aýmaqty tazartty. Bas áskerı-medıtsınalyq basqarmanyń dárigerleri, gospıtalderi men lazaretteri qatardaǵy turǵyndardy qabyldap, emdeýmen aınalysty. Áskerı-kóliktik avıatsııa gýmanıtarlyq júkterdi tasydy, sheteldegi qazaqstandyqtardy elge, eldegi sheteldikterdi – syrtqa tasymaldady. Munyń barlyǵyna qosymsha qarjy bólingen joq, barlyǵy ózimizdiń ishki resýrsymyz esebinen júrgizildi», - dep túsindirdi N. Ermekbaev.

Odan bólek, áskerıler blokbeketterde qyzmet etken, TJ rejımin baqylaý úshin ushqyshsyz ushatyn apparattar qoldanǵan. Patrýl júrgizgen jáne ózge de tapsyrmalardy oryndaǵan.

«Osynyń barlyǵy jaǵdaıdy tezirek qolǵa alýǵa kómektesti dep úmittenemiz», - dedi Nurlan Ermekbaev.