2 myńnan astam apatty uńǵymadan sý dalaǵa aǵyp jatyr - depýtat

NUR-SULTAN. QazAqparat – Parlament Májilisiniń jalpy otyrysynda depýtat Dúısenbaı Turǵanov sý uńǵymalaryn zertteý men barlaý máselesin kóterdi, dep habarlaıdy QazAqparat tilshisi.

«Qazirgi kezde 2 myńnan astam apatty uńǵymadan sý eshbir qadaǵalaýsyz dalaǵa aǵyp ketip jatyr», - dedi D. Turǵanov Premer-Mınıstrdiń orynbasary Roman Sklıardyń atyna joldaǵan saýalynda.

Onyń aıtýynsha, Esep komıtetiniń 2022-2024 jyldarǵa arnalǵan bıýdjet jobasyn baǵalaý boıynsha qorytyndysynda 2015 jyldan beri barlaý men zertteý jumystary jergilikti atqarýshy organdar quzyretine berilgeni atap ótilgen. Іs-sharalardy júzege asyrýdyń monıtorıngi 2020 jylǵa deıin Ulttyq ekonomıka mınıstrligi tarapynan júrgizildi. 2020 jyldan bastap izdeý-zertteý jumystary turǵysyndaǵy is-sharalar jańa «Nurly jer» baǵdarlamasyna engizilmeýi sebebinen, memlekettik organdar tarapynan baqylaý men úılestirý iske asyrylmady.

«Osynyń nátıjesinde, 7 jylda (2012-2019 jyldary) barlaý-zertteý ári tolyq barlaý jumystarynyń jospary sáıkesinshe 86 jáne 91 paıyzǵa oryndaldy. Memlekettik organdardyń osyndaı kelisilmegen ári tıimsiz is-qımyly halyq úshin, sondaı-aq eldiń ekonomıkasy úshin teris saldarǵa alyp kelýi múmkin», - dedi depýtat.