2 myńǵa tarta qazaq kitaptary «Ádebıet portalynda» jarııalandy - Mádenıet jáne aqparat mınıstrligi
Bul týraly búgin Astanada ótken «Qazaqstandyq BAQ jáne ınternet-resýrstardyń básekege qabilettiligin arttyrý» atty semınar-trenıngte QR Mádenıet jáne aqparat mınıstrligi Aqparat jáne muraǵat komıtetiniń tóraǵasy Bolat Qalıanbekov málim etti.
«Bizdiń mınıstrliktiń qoldaýymen jaqyn bolashaqta «Ádebıet portaly» ınternet-kitaphana, stýdentterge arnalǵan ınternet-portal, tanymdyq balalar portaly jobalary iske qosylady. Bul resýrstardyń barlyǵy qazaq tiliniń jáne dástúriniń damýyna baǵyttalyp otyr», - deıdi B.Qalıanbekov.
Onyń atap kórsetkenindeı, áleýmettik mańyzdy ádebıetterdi basyp shyǵarý baǵdarlamasy aıasynda jaryq kórgen kitaptardyń barlyǵy atalmysh portalda toptastyrylýda. Shyǵarmalar qazaq, aǵylshyn, orys jáne túrik tilderinde qoljetimdi. Bolashaqta, mınıstrliktiń jospary boıynsha, bul tizim 7 tilge deıin jetkizilmek.
«Shetelge shyqqan árbirimiz Qazaqstan týraly, onyń mádenıeti men ádebıeti týraly suraǵanda, atalmysh portaldy ashyp, bizdiń avtorlardyń shyǵarmalaryn usyna alamyz degen sóz. Qazir munda 2 myńǵa tarta kitap basyp shyǵaryldy», - dedi komıtet tóraǵasy.