2 myń atyraýlyq sportshy Ánuran shyrqap, baıkerler týdy kóterip sherýletti
Memlekettik rámizderiniń 30 jyldyǵyna arnalǵan respýblıkalyq aktsııaǵa atyraýlyq 2 myń sportshy qosyldy. Búgin olar «Munaıshy» stadıonynda Ánurandy shyrqady.
Oblystyq dene shynyqtyrý jáne sport basqarmasynyń baspasóz qyzmetinen málim etkendeı, Ánurandy oryndaýǵa sporttyq mekemelerdiń tárbıelenýshileri, halyqaralyq dárejedegi sport sheberleri men túrli deńgeıdegi jarystardyń jeńimpazdary qatysty. Al, 400 sportshy stadıonnyń alańynda memlekettik rámizderdiń qabyldanǵanyna 30 jyl tolýyna oraı «30» sanyn beıneledi.
Sondaı-aq, «Wheels Brothers MC» motoklýbynyń baıkerleri memlekettik týdy kóterip, Atyraý qalasynyń kóshelerimen júrip ótti. Baıkerler sherýi Mahambet atyndaǵy akademııalyq qazaq drama teatrynyń aldyndaǵy alańnan bastaldy. Motosherý týtuǵyr alańyna deıin jalǵasty. Oǵan 20-2dan astam baıker qatysty.
«Biz bir-birimizdiń salt-dástúrimizdi qurmetteıtin kópultty elde turamyz. Otanymyzdy jaqsy kóremiz, ári maqtan tutamyz. Bul kúni biz memlekettik týymyzdy alyp júrý arqyly jastardyń otanshyldyq rýhyn kóterýdi kózdedik», -deıdi «Wheels Brothers MC» motoklýbynyń jetekshisi Oleg Shmal.
Qazir rámizder kúnine arnalǵan is-sharalar Jastar saıabaǵynda uıymdastyrylǵan kórmemen jalǵasyp jatyr. Keshke Beıbarys alańynda jurtshylyqqa merekelik kontserttik baǵdarlama usynylady.
Eske sala ketelik, buǵan deıin Atyraýda áskerıler men eriktiler Memlekettik týdy ustap, sherý qurǵanyn jazǵan bolatynbyz.