2 qyrkúıek. QazAqparat kúntizbesi
ESTE QALAR OQIǴALAR
1992 jyly Karelııa jerinde alpys jylǵa jýyq ýaqyt jat elde jerlengen qazaq halqynyń iri tulǵasy, aqyn, jazýshy, qoǵam qaıratkeri, XX ǵasyrdyń bas kezindegi qazaq mádenıeti men ádebıetiniń aıtýly ókili Mirjaqyp Dýlatovtyń súıegin Torǵaı oblysy Jangeldın aýdanyndaǵy óziniń esimimen atalatyn aýylǵa ákelip jerleý úshin arnaýly delegatsııa arnaıy saparǵa attandy.
1994 jyly Almatyda Raıymbek batyr kesenesiniń saltanatty ashylý rásimi boldy.
1995 jyly QR Prezıdentiniń Jarlyǵymen jazýshy Morıs Davıdovıch Sımashko «Qazaqstannyń halyq jazýshysy» ataǵyn aldy. Sımashko Morıs Davıdovıch (1924-2000) - Qazaqstannyń halyq jazýshysy, Qazaqstan Respýblıkasy Prezıdentiniń beıbitshilik jáne rýhanı kelisim syılyǵynyń, Qazaqstan Memlekettik syılyǵynyń laýreaty, Ekinshi dúnıejúzilik soǵys ardageri. Odessa pedagogıkalyq ınstıtýtyn, Qazaq memlekettik ýnıversıtetin bitirgen. Jazýshy shyǵarmalarynyń basty taqyryby – Qazaqstan, Reseı, Ortalyq Azııa jáne Taıaý Shyǵystyń tarıhy men ejelgi mádenıeti boldy. Kórkem aýdarma salasynda І.Esenberlınniń «Kóshpendiler» trılogııasyn, taǵy basqalardyń shyǵarmalaryn orys tiline tárjimalady.
2007 jyly Qazaqstanda alǵash ret kúrdi tiliniń oqýlyǵy jaryq kórdi. Avtory – «Barbang» kúrdter qaýymdastyǵynyń prezıdenti Knıaz Mırzoev. Qazaqstanda kúrd ultynyń 50 myńǵa jýyq ókili turady.
Kúrd ulty ókilderiniń basym bóligi Ońtústik Qazaqstan, Jambyl jáne Almaty oblystarynda. Atalǵan jerlerde kúrd ultynyń mádenıet ortalyqtary jáne kúrd tilinde oqytatyn mektepter ashylǵan. Respýblıkamyzdyń Almaty, Shymkent jáne Taraz qalalarynda ulttyq-mádenıet ortalyqtary jumys isteıdi, orys tilinde aı saıynǵy «Kýrde Zana» gazeti shyǵady.
«Barbang» Qazaqstandaǵy kúrdter qaýymdastyǵy – Qazaqstan halqy Assambleıasyna birinshi bolyp kirgen qoǵamdyq uıym.
2011 jyly Venada Eýropadaǵy qaýipsizdik jáne yntymaqtastyq uıymy shtab-páteriniń ortalyq zaldarynyń biri avstrııalyq Hofbýrg saraıynda Qazaqstandaǵy Semeı ıadrolyq polıgonynyń jabylǵanyna 20 jyl tolýyna arnalǵan fotokórme ashyldy.
Kórmede Semeı polıgonynyń qurylý tarıhy, «Nevada -Semeı» ıadrolyq qarýǵa qarsy qozǵalysy jáne táýelsiz Qazaqstannyń jahandyq ıadrolyq qarýsyzdaný men ony taratpaý isine qosqan úlesi fotosýretter tilimen baıandalǵan.
2011 jyly Máskeýde Qazaqstan Respýblıkasy men Gvatemala Respýblıkasy arasynda dıplomatııalyq qatynastar ornatý jóninde birlesken kommıýnıkege qol qoıyldy. Qujatqa Reseıdegi Qazaqstan Respýblıkasynyń Tótenshe jáne ókiletti elshisi Zaýytbek Turysbekov pen onyń gvatemaldyq áriptesi Artýro Dýarte qol qoıdy.
2015 jyly Astana ýaqytymen saǵat 10.37-de Baıqońyr ǵarysh aılaǵynan «Soıýz TMA-18M» zymyran-tasymaldaǵyshy ushyryldy, onyń bortynda Qazaqstannyń úshinshi ǵaryshkeri Aıdyn Aıymbetov boldy. Aıdyn Aıymbetov bortqa ózimen birge Qazaqstan Respýblıkasynyń, Qazaqstan halqy Assambleıasynyń jáne «EKSPO-2017» halyqaralyq kórmesiniń týyn alyp ushty.
2015 jyly Batys Saharaǵa BUU mıssııasymen birinshi bolyp attanǵan QR Qarýly kúshteriniń ofıtseri, kapıtan Temirlan Músápirov Qazaqstanǵa oraldy. Ol Afrıka elinde týra bir jyl qyzmet etip, áskerı baıqaýshy mindetterin atqardy.
2019 jyly Ulttyq qoǵamdyq senim keńesi quryldy. Onyń negizgi maqsaty – jurtshylyqtyń, saıası partııalardyń, azamattyq qoǵamnyń ókilderimen keńinen talqylaý negizinde memlekettik saıasattyń ózekti máseleleri boıynsha usynystar men usynymdar tujyrymdaý.
2019 jyly Qazaqstan Prezıdenti Qasym-Jomart Toqaev Parlament palatalarynyń birlesken otyrysynda Qazaqstan halqyna Joldaýyn jarııalap, elimizdiń aldaǵy damýyna qatysty baǵyttaryn aıqyndap kórsetti.
«Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynda Memleket basshysy memlekettik basqarý júıesiniń tıimdiligin arttyrý, azamattardyń quqyqtaryn, erkindikteri men qaýipsizdigin qamtamasyz etý, damyǵan jáne ınklıýzıvti ekonomıkany qalyptastyrý, halyqty áleýmettik qamtý salasyn jańǵyrtý, sondaı-aq óńirlerdiń áleýetin nyǵaıtýǵa baǵyttalǵan birqatar bastamalaryn usyndy.
2019 jyly BaigeNews.kz (https://baigenews.kz/ ) qazaqstandyq aqparat agenttigi quryldy. Bul – elimizdegi barlyq oqıǵalar, qazaqstandyq ómirdiń pozıtıvti jaqtary men problemalary týraly baıandaıtyn saıt.
2020 jyly AQSh Saýda palatasy Qazaqstan men Amerıka Qurama shtattarynyń arasyndaǵy saýda-ekonomıkalyq yntymaqtastyqty keńeıtý maqsatynda Qazaqstan-Amerıka Іskerlik keńesiniń (USKZBC) ashylýy týraly resmı túrde jarııalady. Іskerlik keńestiń maqsaty – AQSh Saýda palatasynyń keńeıtilgen platformasy arqyly eki el arasyndaǵy ekonomıkalyq baılanystardy odan ary tereńdetý. Keńes tóraǵasynyń mindeti Qazaqstan ekonomıkasynyń iri ınvestory Chevron kompanııasyna júkteldi