2 qańtar. Jylnama
ESTE QALAR OQIǴALAR
1968 jyly «Vechernıı Almaty» qalalyq gazetiniń alǵashqy sany jaryq kórdi. Basylym qala ákimshiligi men máslıhatynyń, qoǵamdyq jáne mádenı uıymdarynyń turmysyndaǵy jańalyqtardy, kásipkerlik, iskerlik, saýda jáne kólik salasyndaǵy aqparattardy jarııalap turady. 1988 jyldyń 1 maýsymynan qazaq tilindegi nusqasy – «Almaty aqshamy» jaryq kóre bastady.
1992 jyly Qazaqstan Respýblıkasynyń Injenerlik akademııasy quryldy. Onyń prezıdenti bolyp qoǵam jáne memleket qaıratkeri, tehnıka ǵylymynyń doktory, professor, Qazaqstan Respýblıkasy Ulttyq ǵylym akademııasynyń akademıgi, Qazaqstannyń eńbek sińirgen ǵylym qaıratkeri Ómirbek Joldasbekov saılandy.
1992 jyly Norvegııa koroldigi Qazaqstan Respýblıkasynyń Táýelsizdigin moıyndady.
1992 jyly Qazaqstan Respýblıkasy Eýropadaǵy Qaýipsizdik jáne yntymaqtastyq uıymyna múshe boldy.
2007 jyly Qazaqstan Ramsar konventsııasyna qol qoıǵan 154-shi el boldy. Qujat qol qoıylǵan kúnnen bastap tórt aıdan keıin, 2 mamyrda kúshine endi. Qazaqstandaǵy birinshi ramsarlyq nysan – Aqmola oblysynyń Teńiz-Qorǵaljyn kólder júıesi. Ol 1976 jyly halyqaralyq mańyzǵa ıe sýly-batpaqty alqaptardyń tizimine endi.
2011 jyly Qazaqstan TMD elderiniń ishinde alǵash ret Eýropa onkologter mektebiniń strategııalyq seriktesi boldy. EOM qurlyqtyń osy saladaǵy barlyq kásibı mektepterin biriktiredi.
2015 jyly Estonııanyń Astanadaǵy elshiligi NATO-nyń Qazaqstandaǵy baılanys elshiligine aınaldy. Onyń basty mindeti – NATO qyzmeti jáne maqsattarymen tanys, sondaı-aq eldegi baılanystardy nyǵaıtý. Estonııa elshiliginiń NATO baılanys elshiligi retinde qyzmet júrgizýi Soltústik Atlantıkalyq alıanstyń elimizge degen senimin aıǵaqtap, onyń baılanys arnalaryn keńeıte túsedi.
2015 jyly www.eaeunion.org mekenjaıynda ornalasqan Eýrazııalyq ekonomıkalyq odaqtyń (EAEO) veb-saıty jumys isteı bastady. Saıt odaqqa múshe barlyq eldiń ulttyq tilderinde – armıan, belorýs, qazaq jáne orys tilderinde qoljetimdi. Saıttyń aǵylshyn tilindegi nusqasy da bar. Veb-saıt EAEO-ǵa múshe elder: Armenııa, Belarýs, Qazaqstan jáne Reseı týraly aqparatty, negizgi statıstıkalyq málimetterdi, sondaı-aq ulttyq ekonomıkanyń basymdyqtary týraly aqparatty qamtıdy.
2020 jyly Qostanaı oblysy Qostanaı aýdanynyń Zatobol kenti aýdandyq mańyzy bar qalalar sanatyna jatqyzyldy jáne Tobyl qalasy bolyp ataýy ózgertildi.
2021 jyly Qazaqstan Prezıdenti QR Ekologııa kodeksine qol qoıdy. Ol adam men tabıǵat arasyndaǵy qoǵamdyq qatynastardy rettep otyrady. Qazaqstan Respýblıkasy ekologııalyq zańnamasynyń maqsaty – respýblıkadaǵy biryńǵaı memlekettik ekologııalyq saıasatty iske asyrýdyń quqyqtyq negizderin, mindetteri men qaǵıdalaryn, sondaı-aq tetikterin aıqyndaý.
2023 jyly QR Prezıdentiniń «Qazaqstan Respýblıkasynyń memlekettik basqarý júıesin odan ári jetildirý jónindegi sharalar týraly» Jarlyǵymen QR Ekologııa, geologııa jáne tabıǵı resýrstar mınıstrligi QR Ekologııa jáne tabıǵı resýrstar mınıstrligi bolyp qaıta quryldy.
Sondaı-aq memlekettik basqarý júıesin jańǵyrtý jáne tıimdiligin arttyrý maqsatynda QR Premer-Mınıstriniń Keńsesi QR Úkimetiniń apparaty bolyp qaıta quryldy.