2 aıda JІÓ ósimi 3,5 paıyz boldy - Rýslan Dálenov

ASTANA. QazAqparat - Aǵymdaǵy jyldyń eki aıynda jalpy ishki ónim ósimi 3,5 paıyzdy qurady. Bul týraly búgin Úkimet otyrysynda QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«Jalpy osy jylǵy 2 aıdyń qorytyndysy boıynsha jalpy ishki ónim serpini jyldamdady. Inflıatsııa nysanaly dálizde saqtalyp otyr. Investıtsııalar qaıta óse bastady. Al halyqaralyq rezervter turaqty deńgeıde. Osylaısha, jalpy ishki ónimniń ósýi 3,5 paıyzǵa jyldamdady. Qańtarda ol 2,9 paıyzdy quraǵan bolatyn. Mundaı serpin taýarlar óndirisiniń ósýimen, sondaı-aq qyzmet kórsetý sektorynyń ósýimen qamtamasyz etildi. Olardyń jalpy ishki ónimniń ósimine salymy sáıkesinshe 0,91 jáne 2,19 paıyzdyq tarmaqty qurady», - dedi mınıstr.

Onyń aıtýynsha, ınflıatsııa deńgeıi josparlanǵan dálizde saqtaldy. Jyldyń basynan beri ol 0,8 paıyzdy, al jyldyq mánde 4,8 paıyzdy quraǵan. Investıtsııalar serpininde ózgeris boldy. Eger ol ótken aıda tómendese, esepti kezeńde olardyń ósýi 4,2 paıyzǵa jetti.

«Ósim mashınalar men jabdyqtardy satyp alýmen, sondaı-aq «Beıneý-Bozoı-Shymkent» magıstraldy gaz qubyrynyń kompressorlyq stantsııasynyń qurylysymen baılanysty», - dedi ol.

Mınıstrdiń dereginshe, aǵymdaǵy jylǵy 1 aqpandaǵy jaǵdaı boıynsha, eldiń halyqaralyq rezervteri 88,8 mlrd AQSh dollaryn qurady.

«Onyń ishinde altyn-valıýta rezervteri 30,6 mlrd AQSh dollary jáne Ulttyq qordyń aktıvteri 58,2 mlrd AQSh dollary boldy», - dedi R.Dálenov.