2 aıda temirjol arqyly 4 mln tonna tranzıttik júk tasymaldandy
Bul týraly QR Indýstrııa jáne ınfraqurylymdyq damý mınıstri Qaıyrbek Óskenbaev Úkimet otyrysynda aıtty.
«Bıyl qańtar-aqpan aılarynda ótken jyldyń osy kezeńimen salystyrǵanda temirjol kóligimen júk tasymaly 10% artyp 70,8 mln tonnany qurady. Tranzıttik júkterdi tasymaldaý kólemi 20% ósip, 4 mln tonna boldy. Konteınerlermen tasymal 12% artyp, 174,7 myń jıyrma fýttyq balamaǵa jetti.
Bıyl aldymyzda temirjolmen júk tasymaly kólemin 420 mln tonnaǵa, tranzıt tasymaldardy 24,5 mln tonnaǵa jáne konteınerler tranzıtin 1 100 myń jıyrma fýttyq balamaǵa deıin jetkizý mindeti tur», - dedi mınıstr.
Onyń sózine qaraǵanda, búginde tranzıttik júkterdiń shamamen 90%-y temirjol kóligimen tasymaldanady.
«Jalpy, elimizdiń tranzıttik-kóliktik áleýetin damytýdyń negizgi kórsetkishteri «Qýatty óńirler – el damýynyń draıverleri» ulttyq jobasynda aıqyndalǵan.
2025 jylǵa deıin tranzıttik tasymaldy 30 mln tonnaǵa deıin jetkizýimiz kerek.
Osy maqsatqa jetý úshin temirjol ınfraqurylymyn salý, jyljymaly quramdy jańartý, júkterdi konteınerlendirý, balama baǵyttar men halyqaralyq dálizderdi damytý boıynsha sharalar qabyldap jatyrmyz», - dedi Qaıyrbek Óskenbaev.