2 aıda múgedek jáne asyraýshysyz qalǵan jandarǵa 56,7 mlrd teńge tólendi

<p>ASTANA. KAZINFORM - Jyl basynan beri múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardy (MÁJ) tóleýge respýblıkalyq bıýdjetten shamamen 50,1 mlrd teńge jumsaldy, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.&nbsp;</p>

Buǵan qosymsha Memlekettik áleýmettik saqtandyrý qorynan (MÁSQ) eńbekke qabilettiliginen aıyrylý jáne asyraýshysynan aıyrylý boıynsha shamamen 6,6 mlrd teńge somasyna áleýmettik tólemder tólendi.

2024 jylǵy 1 aqpandaǵy jaǵdaı boıynsha múgedektigi boıynsha MÁJ alýshylar sany shamamen 537,3 myń adamdy, al asyraýshysynan aıyrylý jaǵdaıy boıynsha shamamen 192,9 myń adamdy qurady.

Múgedektigi boıynsha memlekettik áleýmettik járdemaqylardyń mólsheri múgedektiktiń tobyna jáne sebebine, sondaı-aq tıisti qarjy jylyna arnalǵan «Respýblıkalyq bıýdjet týraly» zańda belgilengen eń tómen kúnkóris deńgeıiniń shamasyna baılanysty bolady.

Asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan (qaza bolǵan) asyraýshynyń asyraýyndaǵy adamdardyń sanyna, qaıtys bolý sebepterine jáne eń tómen kúnkóris deńgeıine baılanysty bolady.

Budan basqa, mindetti áleýmettik saqtandyrý júıesine qatysýshylarǵa áleýmettik táýekelder týyndaǵan jaǵdaıda MÁSQ-ten áleýmettik tólemder tólenedi. Máselen, 2024 jylǵy 1 aqpandaǵy jaǵdaı boıynsha 85,7 myń adam eńbekke qabilettilikten aıyrylý boıynsha áleýmettik tólem, al asyraýshysynan aıyrylý boıynsha áleýmettik tólemdi shamamen 58,7 myń otbasy aldy.

Tólemderdiń mólsheri jeke bolady jáne mynalarǵa baılanysty: sońǵy 2 jyldaǵy MÁSQ-ke áleýmettik aýdarymdar júrgizilgen ortasha aılyq tabys, eńbekke qabilettiliginen aıyrylý koeffıtsıentteri, asyraýyndaǵy adamdar sany, mindetti áleýmettik saqtandyrý júıesine qatysý ótili jáne tabysty aýystyrý. Bul tólemder respýblıkalyq bıýdjetten tólenetin uqsas járdemaqylarǵa qosymsha júzege asyrylady.

2024 jylǵy 1 qańtardan bastap múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri eń tómen kúnkóris deńgeıiniń ulǵaıýyna baılanysty 7 %-ǵa ósti. QR Úkimetiniń sheshimi boıynsha eńbekke qabilettiliginen aıyrylý jáne asyraýshysynan aıyrylý boıynsha MÁSQ-ten tólenetin tólemderdiń mólsheri de 7 %-ǵa arttyryldy.

Máselen, bıyl jalpy aýrýdan múgedektigi boıynsha MÁJ mólsheri 1-top úshin 95 496 teńgeni, 2-top úshin – 76 397 teńgeni, 3-top úshin – 52 089 teńgeni quraıdy.

2024 jylǵy 1 aqpandaǵy jaǵdaı boıynsha eńbekke qabilettiliginen aıyrylý boıynsha MÁSQ-ten tólenetin áleýmettik tólemderdiń ortasha mólsheri 57 035 teńgeni, asyraýshysynan aıyrylý boıynsha 53 898 teńgeni quraıdy.