2 aı boıy balalarymdy kórmedim - BUU jańalyqtaryna shyqqan almatylyq dáriger

ALMATY. QazAqparat – Almatylyq dáriger, akýsher-gınekolog Altynaı Qaraǵoıshıeva Qalqaman shaǵyn aýdanyndaǵy №1 qalalyq klınıkalyq aýrýhananyń perzenthana bóliminde akýsher, gınekolog bolyp 5 jyldan beri jumys isteıdi.

Qazir atalǵan perzenthana COVID-19 juqtyrǵan áıelderdi bosandyratyn jalǵyz ınfektsııalyq statsıonarǵa aınalǵan. Sondyqtan bul aýrýhanaǵa aqpan aıynan bastap eki ese júkteme túsken.

Basqa perzenthanalardan ereksheligi munda hırýrg, nevropatolog, reanımatolog, kardıolog degen sııaqty mamandar, MRT, KT barlyǵy bar. Basqa perzenthanalar mundaı mamandardy syrttan shaqyrady.

«Aqpan aıynda bizdiń perzenthanaǵa qalalyq Qoǵamdyq basqarma ókilderi kelip jınalys ótkizdi. Naýryzdan bastap bizdiń aýrýhana COVID-19 statsıonary bolady dep aıtty. Búkil qala boıynsha vırýs juqtyrǵan júkti áıelder osy jerden bosandyrylatyn boldy. Bizdi eshkim májbúrlegen joq. Tańdaý quqyǵy boldy. Basqa jaqqa aýysýymyzǵa eshkim qarsylyq bildirmedi. Biraq, perzenthana ujymy biraýyzdan eshqaıda aýyspaımyz dep sheshtik. Elge tóngen indetti tek aýyzbirshilik jeńe alady dep oılaımyn. Aýyr jumystan biz de qashsaq, basqalar da qashsa, alǵy shepte kim qalady?», - dedi Altynaı Qaraǵoıshıeva.

Sol jınalystan soń bólimshede daıyndyq bastalǵan.

«Barlyǵymyzǵa ınfektsıonıster, epıdemıologter sabaq júrgizdi. Qalaı zalalsyzdandyrý kerek, qalaı ota jasaý kerek, qalaı kıim kııý kerek degen sııaqty epıdemıologııalyq sabaqtardy qaıta pysyqtadyq», - dedi A.Qaraǵoıshıeva.

Altynaı isteıtin aýrýhana bólimshesinde qazir 5 dáriger jumys isteıdi. 3 dáriger kúndiz kezekshilikte bolsa, 2 dáriger túngi aýysymǵa shyǵady.

«Óıtkeni qorǵanys kostıýmimen 24 saǵat jumys isteý múlde múmkin emes. Bara salysymen qorǵanys kostıýmin kıemiz. Naýqastardy aralap shyǵamyz. Bir dáriger túsken naýqastardy qabyldaýmen bolsa, ekinshisi ota jasaý, bosandyrý jumysymen aınalysady. Kúnine 2-3 ota jasaýǵa týra keledi. Akýsherlik bólim bolǵan soń, jarty saǵattan keıin ne bolaryn bilmeısiz. Árdaıym daıyn bolý kerek. Qazir qorǵanys kostıýmimen, maskamen áıelderdi bosandyryp, ota jasaımyz. Óte yńǵaısyz, terlep júremiz, maskadan iz qalady. Ota kezinde kózildirik terleıdi. Úırenýge týra keledi», - dedi dáriger.

Naýryzdan beri perzenthana qyzmetkerlerine aýrahanadan oryn bólingen. Altynaı da óziniń áriptesterimen birge 2 aı boıy aýrýhanada qonyp, jumys istegen.

Altynaı Qaraǵoıshıeva 2002-2009 jyldar aralyǵynda S.Asfendııarov atyndaǵy Qazaq ulttyq medıtsınalyq ýnıversıtetinde bilim alǵan.

Eńbek jolyn Qarasaı aýdanynyń Uzynaǵash qalasyna «Dıplommen – aýylǵa» baǵdarlamasy boıynsha bastaǵan.

Qazir ol 2 ul, 1 qyz tárbıelep otyr. Joldasy Erjan Mámbetov - Ulttyq gvardııanyń 55/71 áskerı bóliminiń 7 rota starshınasy.

Pandemııa alǵash kelgen kezde bul otbasy balalaryn aýylǵa jiberip, 2 aı boıy koronavırýspen kúrestiń alǵy shebinde bolǵan.

«Júkti áıelderde kóbinese óz ımmýnıteti bolady. Alaıda aýyr halde pnevmonııamen túsken júktiler de jeterlik. Óıtkeni olardyń barlyq organdary qysylyp turady. Sosyn derttiń damýy óte tez. Olar da kishkentaı bala sııaqty túske deıin jaqsy bolsa, tústen keıin jaǵdaıy nasharlaýy múmkin. Al nárestelerdiń kópshiligi, 95 paıyzy COVID-19 teris nátıjemen dúnıege kelip jatyr. Medıtsına mamandary az bolǵandyqtan, ońaı bolyp jatqan joq. Keshe aınaldyrǵan 2-3 dáriger 7 ota jasap, 6 áıeldi bosandyrdyq», - dedi A. Qaraǵoıshıeva.

Keıipkerimiz BUU saıtynd a ózi týraly maqala shyqqanynan habarsyz bolǵan. Aýysymnan shyqqan kezde ǵana ózi týraly maqalany kórgen.