2,7 mln teńgege alynǵan samokattar «Almaty sý» baqylaýshylarynyń jumysyn jeńildetedi

ALMATY. QazAqparat - «Almaty sý» kásiporny baqylaýshy qyzmetkerlerin samokattarmen qamtamasyz etti. 23 samokatty satyp alýǵa kompanııa 2,7 mln teńge jumsaǵan, dep habarlaıdy QazAqparat tilshisi.

Kásiporyn basshylary bul sharanyń tutynýshylardyń ótinishin tirkeıtinderdiń jumysyn jyldamdatatynyna senimdi.

«Almaty sý» kásipornynyń habarlaýynsha, baqylaýshylar ár úıdegi esepteý quralyndaǵy sandardy jazyp alý, plombalaý jáne boryshkerlerdiń tizimin jańartý úshin júzdegen úı men kommertsııalyq uıymǵa kirip shyǵady. Bul nysandardyń arasy qashyq. Olarǵa kúnde birneshe shaqyrym jaıaý júrýge týra keledi. Jańa quraldar baqylaýshylardyń jumysyn jeńildetedi dep senemiz», - dep málim etti «Almaty sý» kompanııasynan.

Jaqyn arada osyndaı samokattarǵa ınjenerlik jeliler men qudyqtardy qaraıtyn qyzmetkerler otyratyn boldy.

«Aıyna Almatyda 50-ge tarta zańbuzýshylyq tirkeledi. Ásirese, tutynýshylar sýǵa tehnıkalyq qujat rásimdemeı, ruqsatsyz qosylyp, tegin tutynýǵa qushtar», - dedi kompanııadan.

Byltyr qalada 717 úıde sýǵa ruqsatsyz qosylý deregi tirkelgen. 100 jaǵdaıda plomba julynyp tastalǵan.

«Barlyq tirkelgen jaıttar boıynsha jaza qoldanylyp jatyr. Atap aıtqanda, boryshkerler ortalyq káriz júıesi men sýdan ajyratylýda.

Kommýnaldyq qyzmet ókilderiniń belsendi jumysynyń arqasynda debıttik qaryzdy 330 mln teńgeden 100 mln teńgege azaıtý múmkin boldy», - dedi kompanııa ókilderi.