2,5 mln aýyl turǵyny keń jolaqty Internetke qol jetkizedi

NUR-SULTAN. QazAqparat – Qazaqstanda aýylda turatyn 2,5 mln turǵyn jáne 2,5 myń memlekettik mekeme keń jolaqty Internetke qosylady, dep habarlaıdy QazAqparat «Qazaqtelekom» AQ baspasóz qyzmetine silteme jasap.

«Aýyldyq eldi mekenderge talshyqty-optıkalyq baılanys jelilerin (AEM TOBJ) tartý jobasy bizdiń kompanııa memlekettik-jekeshe áriptestik tetigi arqyly iske asyryp otyrǵan eń aýqymdy ári alǵashqy joba. 2020 jyldyń sońyna deıin óz qarajatymyzǵa talshyqty-optıkalyq jelilerdi tartyp, oǵan memlekettik mekemelerdi, bıýdjet uıymdaryn qosýdy josparlap otyrmyz. Strategııalyq jobanyń erekshe mańyzy mynada, qurylǵan ınfraqurylymdy naryqtyń basqa qatysýshylarynyń da servıster usynýyna qoldanýǵa bolady. Sonyń ishinde uıaly baılanys kompanııalarynyń ishki jelilerdi tartýyna, tolyq spektrli telekommýnıkatsııa qyzmetterin kórsetýine múmkindik beredi.

«Qazaqtelekom» memlekettik-jekeshe áriptestik aıasynda «Talshyqty-optıkalyq baılanys jelileri tehnologııasy boıynsha Qazaqstan Respýblıkasynyń Aýyldyq eldi mekenderin keń jolaqty qoljetimdilikpen qamtamasyz etý» jobasyn iske asyryp keledi. Keler jyldyń aıaǵyna qaraı mektepter, medıtsına mekemeleri, ákimdikter, ulttyq qorǵanys nysandary, polıtsııa, apat qyzmetteri sekildi memlekettik uıymdar men bıýdjettik mekemeler jyldam Internetpen qamtylady», - delingen habarlamada.

Memlekettik mekemelerden bólek, qarapaıym aýyl turǵynynyń da jyldam Internetke qoly jetedi. Joba aıasynda elimizdiń 828 aýylyna jyldam baılanys jelisi tartylady. Sol arqyly 2 500 memlekettik mekeme jáne 2,5 mln adam qamtylady.

Eske sala ketsek, Parlamentte Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev aýyldar men qalalalardaǵy ınternet tarıfinde aıyrmashylyq bolmaıtyny jóninde málim etken.

Avtoryy Meırambek Baıǵarın